28 сакавіка ў галерэі “Ракурс” адбылося ўрачыстае адкрыццё V Мінскай міжнароднай выстаўкі графікі “Арт-лінія”.
Адна з самых прадстаўнічых выставак графікі ў Беларусі сабрала сёлета пад сваёй эгідай работы мастакоў больш чым з 10 краін свету (Беларусі, Расіі, Украіны, Таджыкістана, Казахстана, Польшчы, Бельгіі і інш.).
Адным са складнікаў пятай “Арт-лініі” стала выстаўка твораў мастакоў – удзельнікаў творчых майстэрняў “Сенеж” (Расія), якія доўгі час узначальваў народны мастак Беларусі, лаўрэат Дзяржаўнай прэміі Рэспублікі Беларусь, член Нацыянальнай акадэміі навук Беларусі і Расійскай акадэміі мастацтваў Георгій Паплаўскі. Увазе публікі былі прадстаўлены творы ўдзельнікаў майстэрняў 70-х гг. з прыватнай калекцыі Леаніда і Ніны Марчанкаў.
Традыцыйна ў Мінскую міжнародную выстаўку графікі “Арт-лінія” ўключана рэтрапраграма – калекцыя эстампаў бельгійскага мастака-сімваліста Фелісьена Ропса.
Адкрыла вернісаж першы намеснік дырэктара Нацыянальнай бібліятэкі Беларусі па абслугоўванні карыстальнікаў і ідэалогіі Алена Далгаполава. У мерапрыемстве ўзялі ўдзел куратар праекта, загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб; мастацтвазнавец, член Беларускага саюза мастакоў Ніна Марчанка; галоўны бібліёграф аддзела бібліяграфічнай апрацоўкі дакументаў Нацыянальнай бібліятэкі Беларусі Галіна Апановіч.