14 кастрычніка ў галерэі “Панарама” (22-гі паверх) адбылося ўрачыстае адкрыццё выстаўкі авангарднага жывапісу Уладзіміра Акулава, прысвечанай 60-годдзю мастака.
Уладзімір Акулаў – яркі прадстаўнік другой хвалі беларускага авангарда. На яго фарміраванне як чалавека і мастака пад час вучобы на мастацка-графічным факультэце Віцебскага дзяржаўнага педагагічнага ўніверсітэта вялікі ўплыў аказаў мастак і педагог Аляксандр Салаўёў.
Як адзначыла пад час мерапрыемства намеснік дырэктара па інфармацыйных рэсурсах Нацыянальнай бібліятэкі Беларусі Таццяна Кузьмініч, творчасць Акулава заўсёды распазнавальная. “Дзякуй нашай краіне за вялікія таленты, якія яна дорыць нам! Спадзяюся, што адкрыццё чарговай выстаўкі дасць крылы мастаку на стварэнне новых шэдэўраў”, – сказала яна.
”Акулаў нават пад час росквіту авангарда не быў падобны ні да каго, – лічыць мастацтвазнавец Ларыса Фінкельштэйн. – Ён вылучаецца адвагай і незалежнасцю ад стыляў і канонаў, дзякуючы чаму мы бачым вельмі рознага таленавітага мастака”. Спецыяліст расказала гасцям выстаўкі пра тое, што экспазіцыя сабрала работы майстра розных гадоў, сярод якіх можна ўбачыць і “першыя закаханасці” у творчасць знакамітых еўрапейскіх мастакоў, і сталыя шэдэўры Уладзіміра Акулава.
З’яўляючыся чалавекам дапытлівым, знаходзячыся заўсёды ў пошуку, Уладзімір Акулаў аб’ездзіў увесь былы Савецкі Саюз ад Цюмені і Краснадара да крымскага Кактэбеля, працаваў у Германіі, Бельгіі, Італіі. Больш за тое, у Германіі, Бельгіі і ЗША засталіся цэлыя цыклы яго работ.
Выстаўка працуе з 15 кастрычніка, уваход платны (складае кошт наведвання агляднай пляцоўкі).
Тэлефоны для даведкі: (8 017) 293 27 56, 293 28 33.
Е-mail: pr@nlb.by
 |
 |
 |
 |
 |
 |
