27–28 красавіка ў Нацыянальнай бібліятэцы Беларусі адбыліся ХІХ Міжнародныя кнігазнаўчыя чытанні. За два дні на пленарным і рабочых пасяджэннях выступілі больш за 60 навукоўцаў з Беларусі і Расіі.
На пасяджэннях прагучалі даклады беларускіх даследчыкаў Цэнтральнай навуковай бібліятэкі імя Якуба Коласа НАН Беларусі, Прэзідэнцкай бібліятэкі Рэспублікі Беларусь, Мінскай духоўнай акадэміі, прадстаўнікоў Беларускага дзяржаўнага тэхналагічнага ўніверсітэта, Беларускага дзяржаўнага медыцынскага ўніверсітэта, а таксама супрацоўнікаў бібліятэк, музеяў і архіваў з розных рэгіёнаў Беларусі.
Канферэнцыя праходзіла ў змешаным фармаце, былі арганізаваны анлайн-трансляцыя і дыстанцыйнае падключэнне аддаленых удзельнікаў. Шэраг даследчыкаў устаноў культуры Расійскай Федэрацыі – Нацыянальнай бібліятэкі Рэспублікі Татарстан, Нацыянальнай бібліятэкі Рэспублікі Карэлія, Нацыянальнай бібліятэкі Удмурцкай Рэспублікі, Калінінградскай абласной навуковай біблатэкі, Калужскай абласной навуковай бібліятэкі імя В.Р. Бялінскага – прадставілі вынікі сваіх навуковых пошукаў у дыстанцыйным фармаце.
Запіс трансляцыі будзе даступны на канале Нацыянальнай бібліятэкі Беларусі. Матэрыялы канферэнцыі апублікаваны ў зборніку “Матэрыялы ХІХ Міжнародных кнігазнаўчых чытанняў”.
Канферэнцыя дазволіла абмеркаваць шырокае кола пытанняў, сярод якіх эвалюцыя кніжнай культуры ад старажытных рукапісаў да выкарыстання сучасных інфармацыйных тэхналогій, сучасны стан і перспектывы развіцця комплекснай навукі пра кнігу.
Выказваем падзяку партнёрам мерапрыемства – ААТ “Спартак” і ЗАТ “Мінскі завод безалкагольных напояў”.
Праграма МКЧ. Відэазапіс канферэнцыі (2-гі дзень):
Матэрыял пададзены навукова-даследчым аддзелам кнігазнаўства.
Чытайце таксама:
Адбылося ўрачыстае адкрыццё Міжнародных кнігазнаўчых чытанняў – 2023
