28 красавіка ў галерэі “Лабірынт” адбылася лекцыя-канцэрт “Талака” з цыкла “Нацыянальная музычная спадчына Беларусі”.
Талака (калектыўная праца, добраахвотная і бескарыслівая) – адна з самых старажытных традыцый беларусаў. Увесну ці ўвосень разам выходзілі на палі. Менавіта талакой збіралі ўраджай. Ну а пасля працы арганізоўвалі агульнае свята. Менавіта такое свята і стварыла для слухачоў музычная капэла Цэнтра даследаванняў беларускай культуры, мовы і літаратуры НАН Беларусі.
Музыканты і госці мерапрыемства з энтузіязмам выканалі народныя песні “Пасеялі дзеўкі лён”, “Туман ярам даліною”, “Цячэ вада ў ярок” і інш. Кіраўнік капэлы Галіна Цмыг распавяла пра некалькі тыпаў інтэрпрэтацыі народных песень у музычным мастацтве і пра таленавітыя апрацоўкі беларускіх кампазітараў. Прагучалі вядомыя народныя песні ў апрацоўках А. Рашчынскага, А. Важніка, А. Саўрыцкага, Л. Захлеўнага, В. Кузняцова, М. Сіраты. А ўдзельніца харавой капэлы мультыінструменталіст Кацярына Радзівілава распавяла аб прынцыпах гуказдабывання ў народным беларускім інструменце дуда і выканала на ім народны танец “Матлет” і польку “Акуліна”.
Чакаем усіх жадаючых на наступным канцэрце “Музычная капэла”, у якім будзе нададзена ўвага асаблівасцям фарміравання выканальніцкага прафесіяналізму на беларускіх землях і працэсам пераемнасці на матэрыяле дзейнасці прыдворных капэл XVIII ст. і музычных капэл канца XX – пачатку XXI ст. Слухачы змогуць узяць удзел у абмеркаванні праблематыкі беларускага музычнага краязнаўства. Сустрэча адбудзецца 25 мая ў 18.30.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.