27 красавіка ў Нацыянальнай бібліятэцы Беларусі адбылося адкрыццё XIX Міжнародных кнігазнаўчых чытанняў.
Да ўдзельнікаў канферэнцыі з прывітальным словам звярнуліся намеснік міністра культуры Рэспублікі Беларусь Валерый Грамада, намеснік генеральнага дырэктара – дырэктар па інфармацыйных рэсурсах і абслугоўванні карыстальнікаў Нацыянальнай бібліятэкі Беларусі Віктар Пшыбытка, а таксама ў фармаце відэазвароту – генеральны дырэктар Расійскай дзяржаўнай бібліятэкі Вадзім Дуда.
За першы дзень на пленарным і рабочым пасяджэннях прагучала больш за 40 дакладаў вучоных з Беларусі і Расіі. Анлайн-трансляцыя канферэнцыі дазволіла завочна папрысутнічаць у якасці гасцей усім жадаючым з розных краін.
На пленарным пасяджэнні прагучалі даклады загадчыцы навукова-даследчага аддзела рэдкіх кніг Расійскай дзяржаўнай бібліятэкі Джамілі Рамазанавай, вядучага навуковага супрацоўніка Інстытута славяназнаўства Расійскай акадэміі навук Юрыя Лабынцава і старшага навуковага супрацоўніка Ларысы Шчавінскай, супрацоўнікаў Веткаўскага музея стараверства і беларускіх традыцый імя Ф. Шклярава Галіны Нячаевай і Святланы Лявонцьевай, вядучага навуковага супрацоўніка Інстытута гісторыі НАН Беларусі Алега Дзярновіча, супрацоўнікаў Нацыянальнага полацкага гісторыка-культурнага музея-запаведніка Веры Ашуевай і Дыяны Кашкур, а таксама прадстаўнікоў іншых устаноў культуры.
Кола пытанняў, якія абмяркоўваліся на канферэнцыі, ахапіла важныя аспекты развіцця кніжнай культуры – ад рукапісаў да выкарыстання сучасных інфармацыйных тэхналогій на ўсіх этапах функцыянавання кнігі.
Міжнародныя кнігазнаўчыя чытанні праходзяць штогод і аб’ядноўваюць спецыялістаў і навукоўцаў з розных краін, з’яўляючыся добрай пляцоўкай для абмеркавання праблем захавання, вывучэння і перадачы будучым пакаленням кніжнай спадчыны і культуры.
Праграма МКЧ. Відэазапіс канферэнцыі (1-шы дзень):
Матэрыял пададзены навукова-даследчым аддзелам кнігазнаўства.
Чытайце таксама:
Адбыліся Міжнародныя кнігазнаўчыя чытанні
