25–26 кастрычніка на базе Цэнтральнай бібліятэкі горада Пінска прайшоў абласны семінар “Чытанне і чытач: новы фармат бібліятэчнай прасторы”.
Арганізатарамі мерапрыемства выступілі Галоўнае ўпраўленне ідэалагічнай работы, культуры і па справах моладзі Брэсцкага аблвыканкама, Брэсцкая абласная бібліятэка імя М. Горкага.
У семінары прынялі ўдзел прадстаўнікі Міністэрства культуры Рэспублікі Беларусь, Нацыянальнай бібліятэкі Беларусі, кіраўнікі бібліятэк Брэсцкай вобласці.
У першы дзень удзельнікі абмеркавалі перспектыўныя напрамкі развіцця бібліятэк, намецілі ключавыя праблемы, якія патрабуюць аператыўнага вырашэння, у тым ліку з дапамогай дзяржаўнага рэгулявання.
Першы намеснік дырэктара па абслугоўванні карыстальнікаў і ідэалогіі Нацыянальнай бібліятэкі Беларусі, старшыня Беларускай бібліятэчнай асацыяцыі Алена Далгаполава ў сваім дакладзе “Бібліятэкі і падтрымка чытання: да пастаноўкі праблемы” засяродзіла ўвагу на ролі сям'і, устаноў адукацыі і бібліятэк у вырашэнні задачы развіцця і падтрымкі чытання. Алена Ерамееўна таксама пазнаёміла ўдзельнікаў семінара з асноўнымі напрамкамі і вынікамі дзейнасці Беларускай бібліятэчнай асацыяцыі.
Загадчыца навукова-даследчага аддзела бібліятэказнаўства Марына Пшыбытка ў дакладзе “Час крэатыўнага бібліятэкара: ад прадпісанняў да творчых ініцыятыў” прадставіла слухачам прыклады паспяхова рэалізаваных замежных і беларускіх праектаў з дапамогай фандрайзінгу.
Другі дзень працы прадоўжыўся ў фармаце круглага стала на тэму “Чытач у бібліятэцы: новае мысленне, новыя магчымасці”. Спецыялісты падзяліліся вопытам арганізацыі камфортнай бібліятэчнай прасторы для ўсіх груп насельніцтва, у тым ліку з абмежаванымі фізічнымі магчымасцямі.
Нароўні з абмеркаваннем надзённых праблем, у ходзе семінара ўдзельнікі азнаёміліся з работай Цэнтральнай бібліятэкі г. Пінска, наведалі аб'яднаную бібліятэку вёскі Калауравічы, паназіралі за працай аўтабібліятэкі Пінскага раёна.
 |
 |
 |
 |
 |
 |
