21 студзеня Нацыянальнай бібліятэцы Беларусі была перададзена ў дар калекцыя твораў мастацтва Міжнароднай гільдыі жывапісцаў.
Міжнародная гільдыя жывапісцаў – самастойны творчы саюз, у склад якога ўваходзяць каля 70 беларускіх майстроў жывапісу і акварэлі, а таксама мастакі іншых краін. Дзякуючы сумеснай дзейнасці Нацыянальнай бібліятэкі Беларусі і гільдыі жывапісцаў здзейснены шэраг арыгінальных і маштабных праектаў.
Мастацкая калекцыя складаецца з 70 твораў вядомых беларускіх жывапісцаў, графікаў, фотамастакоў. Усе падараваныя работы былі прадстаўлены гледачу на выстаўцы-прэзентацыі. Калекцыя сучаснага жывапісу дазволіць эстэтычна ўпрыгожыць інтэр’ер чытальных залаў бібліятэкі.
У рамках прэзентацыі была разгорнута дакументальна-ілюстрацыйная выстаўка, прысвечаная дзейнасці Міжнароднай гільдыі жывапісцаў, якая змяшчае водгукі аб праектах у перыядычным друку, афішы і запрашэнні, фотаздымкі мерапрыемстваў творчага саюза, каталогі выставак і іншы ілюстрацыйны матэрыял.
Адкрыў выстаўку-прэзентацыю загадчык аддзела галерэйна-выставачнай дзейнасці Нацыянальнай бібліятэкі Беларусі, старшыня Міжнароднай гільдыі жывапісцаў Ф.А. Ястраб. У мерапрыемстве таксама бралі ўдзел заслужаны дзеяч мастацтваў Беларусі, старшыня секцыі жывапісу Беларускага саюза мастакоў У.У. Кожух; член экспертнай камісіі Беларускага грамадскага аб’яднання “Фотамастацтва” В.У. Вядрэнка; жывапісец, старшы выкладчык кафедры мастацтваў Дзяржаўнага інстытута кіравання і сацыяльных тэхналогій Беларускага дзяржаўнага універсітэта Н.А. Рачкоўская. Прывітаў гасцей і выказаў словы падзякі вядомым мастакам дырэктар Нацыянальнай бібліятэкі Беларусі Р.С. Матульскі.
Музыкальнай творчасцю парадаваў інструментальны ансамбль “Першацвет” пад кіраўніцтвам В.С. Тульвінскага сярэдняй школы № 13 г. Мінска.
Выстаўка будзе функцыянаваць у галерэях “Атрыум” і “Мабільная” да 26 лютага. Дакументальна-ілюстрацыйная экспазіцыя размесціцца на 3-м паверсе кальцавога калідора.
 |
 |
 |
 |
 |
