29 лістапада ў Нацыянальнай бібліятэцы Беларусі прайшлі Пятыя Беларускія Калядныя чытанні на тэму “Вялікая Перамога: спадчына і нашчадкі”.
На ўрачыстым адкрыцці было падпісана пагадненне аб супрацоўніцтве паміж Беларускай праваслаўнай царквой і Міністэрствам інфармацыі Рэспублікі Беларусь.
У мерапрыемстве ўзялі ўдзел Мітрапаліт Мінскі і Заслаўскі, Патрыяршы Экзарх усяе Беларусі Павел, міністр інфармацыі Рэспублікі Беларусь Аляксандр Карлюкевіч, міністр аховы здароўя Рэспублікі Беларусь Уладзімір Каранік, міністр працы і сацыяльнай абароны Рэспублікі Беларусь Ірына Касцевіч, дырэктар Нацыянальнай бібліятэкі Беларусі Раман Матульскі.
Калядныя чытанні далі старт канферэнцыям, пасяджэнням, круглым сталам на розных пляцоўках сталіцы. У Нацыянальнай бібліятэцы прайшло пленарнае пасяджэнне, у рамках якога адбылася цырымонія ўзнагароджання ўдзельнікаў рэспубліканскага конкурсу “Бібліятэка – цэнтр духоўнай асветы і выхавання”.
Таксама ў “алмазе ведаў” была праведзена секцыя “Духоўная асвета праз дзейнасць бібліятэк”. Старшынствавалі – протаіерэй Уладзімір Барысевіч і галоўны бібліятэкар навукова-даследчага аддзела бібліятэказнаўства Нацыянальнай бібліятэкі Беларусі Вольга Рынкевіч.
У гэтым годзе гасцямі і ўдзельнікамі калядных чытанняў сталі творчы калектыў былых малалетніх вязняў фашызму “Лёсы” Першамайскага раёна, святары, прадстаўнікі органаў улады, дзеячы культуры, навуковыя работнікі, прадстаўнікі сілавых структур, устаноў адукацыі, медыцынскія і сацыяльныя работнікі, прадстаўнікі іншых кірункаў.
Мерапрыемства ўпрыгожыла выступленне аркестра Ваеннай акадэміі Рэспублікі Беларусь.
Матэрыял прадастаўлены аддзелам сувязей з грамадскасцю.
