22 кастрычніка 2020 г. для Рэспублікі Беларусь уступіў у сілу Маракешскі дагавор аб палягчэнні доступу сляпых і асоб з парушэннямі зроку ці іншымі абмежаванымі здольнасцямі ўспрымаць друкаваную інфармацыю да апублікаваных твораў.
Міжнародная прававая база дагавора дазваляе ствараць, распаўсюджваць і абменьваць праз нацыянальныя межы асобнікі ў даступных фарматах для бенефіцыяраў – невідушчых, асоб з парушэннямі зроку, не здольных чытаць, якія не маюць магчымасці з прычыны якога-небудзь фізічнага недахопу трымаць кнігу.
У Беларусі ў якасці ўпаўнаважаных органаў, якія могуць ажыццяўляць трансгранічны абмен, вызначаны бібліятэкі, установы адукацыі і грамадскія аб’яднанні інвалідаў. Органам, які каардынуе дзейнасць дзяржаўных органаў і іншых арганізацый па рэалізацыі Маракешскага дагавора, з’яўляецца Дзяржаўны камітэт па навуцы і тэхналогіях.
Для бібліятэк нашай краіны апублікавана практычны дапаможнік “Приступая к действиям. Реализация норм Марракешского договора для лиц с ограниченными способностями воспринимать печатную информацию”. Версію дапаможніка падрыхтавалі: Санія Баталава, рэгіянальны каардынатар EIFL па Маракешскім дагаворы; Кацярына Янцікава, начальнік аддзела заканадаўства ў сферы аўтарскага і сумежных праў Нацыянальнага цэнтра інтэлектуальнай уласнасці; Алена Далгаполава, першы намеснік генеральнага дырэктара Нацыянальнай бібліятэкі Беларусі; Вольга Несцярэўская, загадчыца аддзела бібліятэчнага абслугоўвання.
Дакумент складзены ў форме пытанняў і адказаў, адлюстроўвае нормы нацыянальнага заканадаўства ў галіне аўтарскага права і змяшчае тлумачэнні па ўжыванні Маракешскага дагавора на практыцы. Дапаможнік будзе карысны супрацоўнікам бібліятэк і іншых упаўнаважаных органаў, якія забяспечваюць доступ да інфармацыйных рэсурсаў карыстальнікам з абмежаванымі здольнасцямі ўспрымання друкаванай інфармацыі.
Матэрыял пададзены аддзелам бібліятэчнага абслугоўвання.