Дарагія сябры! Нішто добрае не можа доўжыцца вечна. Такое жыццё. Таму мы з лёгкім сэрцам аб'яўляем: BelBookChallenge падышоў к фіналу. Самы час аб'явіць яго вынікі.
101 дзень, 12 тэм, 11 падборак з рэкамендацыямі, 59 прапанаваных кніг і незлічоная колькасць слоў у рэцэнзіях – гэты чэлендж быў не з простых, але таму толькі прыемней аб'явіць аб яго завяршэнні.
Мы бязмерна ўдзячныя ўсім, хто знайшоў у сабе мужнасць прыняць выклік і кінуцца з галавой у бездань сучаснай беларускай літаратуры разам з намі. Мы неверагодна ганарымся тымі, хто адважыўся не проста чытаць кнігі, якія адпавядаюць прапанаваным тэмам, але і складаць на іх шчырыя водгукі. І мы вельмі рады, што сярод чытачоў знайшліся тыя, хто не пасаромеўся падзяліцца гэтымі рэцэнзіямі ў сацыяльных сетках.
У такіх актыўнасцях, вядома, галоўнае – сам факт удзелу, аднак мы не можам не адзначыць тых трох смельчакоў, якія змаглі не толькі пачаць, але і завяршыць BelBookChallenge. Бо адолець цэлых 12 кніг – задача не з лёгкіх! Зрэшты, сярод нашых чытачоў знайшліся тыя, хто з гэтым справіўся.
Пальма першынства ў чытанні на хуткасць дасталася Марыне Елісеевай, следам за ёй трыумфальна завяршылі чэлендж Вераніка Васільева і Павел Яцін. Асабліва адзначаем рэцэнзіі Веранікі на «Калядны стол» Зараславы Камінскай, якія стыхійна ператварыліся ў цэлую серыю тэкстаў у стылі арыгінальнага твора – выйшла вельмі кранальна. У бліжэйшы час мы абавязкова звяжамся з трыма нашымі героямі, каб прызы знайшлі сваіх адрасатаў.
Дзякуй усім, хто сачыў за падборкамі рэкамендацый да чэленджу, чытаў для сябе ці прымаў ва ўсім актыўны ўдзел!
Сустрэнемся на BelBookChallenge-2021!