Вучні школы № 137 г. Мінска пераканаліся, што ў Нацыянальнай бібліятэцы можна вельмі цікава бавіць час! Вынікам музейных заняткаў “Партрэт першадрукара” сталі новыя веды, добры настрой і створаныя дзеткамі яркія партрэты Францыска Скарыны.
Музей кнігі – незвычайная прастора, дзе пануе асаблівая атмасфера. Сярод старых кніг, некаторым з якіх ужо больш за 500 гадоў, можна вывучаць гісторыю і мастацтва кнігі.
У музеі кнігі дзеці разглядалі шматлікія партрэты Францыска Скарыны. Прыжыццёвы партрэт першадрукара быў двойчы размешчаны ў яго кнігах 1517–1518 гг. Разглядаючы гравюрны партрэт, дзеці сканцэнтравалі ўвагу на асноўных элементах: выява самога Скарыны з кнігай, знакі Сонца і паўмесяца, а таксама шасціногая муха (пчала), якая “сядзіць” на старонцы.
Першым жывапісным партрэтам нашага першадрукара стаў партрэт рукі Язэпа Драздовіча. У 1927-м і першай палове 1940-х гг. мастак напісаў шэраг карцін і акварэляў, прысвечаных Францыску Скарыне. Партрэты асветніка стваралі і іншыя знакамітыя беларускія мастакі, сярод якіх – Іван Ахрэмчык, Гаўрыіл Вашчанка, Мікалай Байрачны, Віктар Шматаў, Валянцін і Ляіля Варэцы, Павел Татарнікаў.
Дзеці паглядзелі іх работы і самі ўзяліся за стварэнне партрэтаў. Некаторыя падышлі да творчага задання арыгінальна і зрабілі тантамарэскі – яркія стэнды для фатаздымкаў з адтулінай для твару. У выніку, кожны ўдзельнік ненадоўга “стаў беларускім першадрукаром”.
Заняткі арганізаваны ў рамках праекта “У госці да кніг”.
Матэрыял пададзены навукова-даследчым аддзелам кнігазнаўства.
Чытайце таксама: