2 жніўня ў анлайн-фармаце адбылася цырымонія падпісання Пагаднення аб устанаўленні стратэгічнага супрацоўніцтва і пабрацімскіх адносін паміж Нацыянальнай бібліятэкай Беларусі і Цзінанскай гарадской бібліятэкай.
З кітайскага боку з прывітаннем выступілі намеснік старшыні Упраўлення культуры і турызму г. Цзінань Янь Сяньфэн, начальнік аддзела дзяржаўных паслуг Упраўлення культуры і турызму г. Цзінань У Бо і генеральны дырэктар Цзінанскай гарадской бібліятэкі Ван Хай.
З беларускага боку ў цырымоніі падпісання прынялі ўдзел начальнік упраўлення культуры і народнай творчасці Міністэрства культуры Рэспублікі Беларусь Ірына Карповіч, начальнік упраўлення культуры Мінскага гарадскога выканаўчага камітэта Віталь Брэль, генеральны дырэктар Нацыянальнай бібліятэкі Беларусі Вадзім Гігін, намеснік генеральнага дырэктара Нацыянальнай бібліятэкі Беларусі Віктар Пшыбытка і старшыня Асацыяцыі арганізацый кітайскіх суайчыннікаў “Хуацяо” Ван Сяамен.
Бакі сышліся ў меркаванні, што дадзенае мерапрыемства стане адпраўным пунктам для развіцця ўзаемнага супрацоўніцтва ў розных галінах бібліятэчнай сферы.
Вадзім Гігін адзначыў: “Падпісанне пагаднення будзе садзейнічаць умацаванню кантактаў не толькі паміж Нацыянальнай бібліятэкай Беларусі і Цзінанскай гарадской бібліятэкай, але і паміж Рэспублікай Беларусь і Кітайскай Народнай Рэспублікай”.
Нацыянальная бібліятэка Беларусі выказвае падзяку Асацыяцыі арганізацый кітайскіх суайчыннікаў “Хуацяо” за садзейнічанне ў падрыхтоўцы мерапрыемства.
Матэрыял пададзены аддзелам сувязей з грамадскасцю.