18 чэрвеня ў бібліятэцы адбылася прэзентацыя і ўрачыстая цырымонія перадачы факсімільнага выдання “Кніжная спадчына Францыска Скарыны” прадстаўнікам замежных дыпламатычных місій у Рэспубліцы Беларусь і бібліятэкам Мінскай вобласці.
Нацыянальная бібліятэка Беларусі сумесна з Белзнешэканомбанкам рэалізавала першую частку агульнанацыянальнага праекта па выпуску першых пяці тамоў факсімільнага выдання поўнага збору кніг Францыска Скарыны. Выдавецкі праект разлічаны на перыяд 2013–2017 гг. і прымеркаваны да 500-годдзя беларускага кнігадрукавання. За гэты перыяд мяркуецца выпусціць факсіміле 25 кніг у 20 тамах – поўны рэпертуар выданняў, якія былі надрукаваны Францыскам Скарынам у Празе і Вільні.
Урачыстую цырымонію адкрыў міністр культуры Рэспублікі Беларусь Барыс Святлоў. Ён падзякаваў за паспяховую рэалізацыю праекта і перадаў прадстаўнікам замежных дыпламатычных місій краін, звязаных з лёсам беларускага першадрукара, першых пяць тамоў выдання.
Пад час прэзентацыі значнасць праекта падкрэсліў Надзвычайны і Паўнамоцны Пасол Чэшскай Рэспублікі ў Рэспубліцы Беларусь Мілан Экерт, які засяродзіў увагу на пражскім перыядзе жыцця і творчасці Францыска Скарыны. Спадар пасол выказаў словы ўдзячнасці Нацыянальнай бібліятэцы Беларусі і Белзнешэканомбанку.
Са значнай культурнай падзеяй у жыцці нашай краіны прысутных павіншаваў дырэктар Нацыянальнай бібліятэкі Беларусі Раман Матульскі і выказаў спадзяванне, што факсімільнае ўзнаўленне прац беларускага першадрукара пазнаёміць шырокую грамадскасць з адным з найбольш каштоўных скарбаў кніжнай культуры Беларусі. Пяцітомнік факсімільнага выдання “Кніжная спадчына Францыска Скарыны” быў перададзены бібліятэкам усіх раёнаў Мінскай вобласці.
Факсімільнае выданне атрымалі таксама члены аўтарскага калектыву, асобы, плённая праца якіх дала магчымасць паспяхова рэалізаваць праект: намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандр Суша, загадчык навукова-даследчага аддзела кнігазнаўства Галіна Кірэева, галоўны навуковы супрацоўнік Інстытута гісторыі Нацыянальнай акадэміі навук Беларусі Георгій Галенчанка, вядучы навуковы супрацоўнік Цэнтра даследаванняў беларускай культуры, мовы і літаратуры Нацыянальнай акадэміі навук Беларусі Аляксандр Бразгуноў.
Факсімільнае выданне з максімальнай паўнатой аднаўляе кнігі Францыска Скарыны. У іх захаваны структура, змест, асаблівасці шрыфтоў і гравюр арыгіналаў, перададзены ўсе штрыхі, набытыя на працягу амаль 500-гадовага існавання.
Факсімільнае выданне кніг беларускага першадрукара прадстаўляе грамадскасці каштоўны пласт культурнай спадчыны нашага народа і з’яўляецца базавай крыніцай для гістарычных, філалагічных, культуралагічных і кнігазнаўчых даследаванняў.
|
|
|
|
|
|
|
|
|
|
|
|
