17 снежня ў Нацыянальнай бібліятэцы Беларусі адбылася прэзентацыя другога тома “Энцыклапедыі для школьнікаў і студэнтаў. Фізіка. Матэматыка”, выпушчанага ў выдавецтве “Беларуская Энцыклапедыя імя П. Броўкі”.
Другі том 12-томнага выдання “Энцыклапедыя для школьнікаў і студэнтаў” раскрывае асновы сучасных фізічных уяўленняў аб прыродзе разнастайных з’яў, а таксама ключавыя матэматычныя паняцці. Коратка даецца гісторыя фізікі і матэматыкі ў Беларусі. Мэта кнігі – дапамагчы юнаму чытачу, які мае пэўны фізіка-матэматычны досвед, засвоіць агульныя канцэпцыі фізікі і матэматыкі. Разгледжаны розныя пытанні, якія ўзнікаюць у дапытлівых школьнікаў старэйшых класаў і студэнтаў.
У прэзентацыі ўзялі ўдзел дырэктар выдавецтва “Беларуская Энцыклапедыя імя П. Броўкі” Таццяна Бялова; кіраўнік творчага калектыву праекта, дырэктар Рэспубліканскага інстытута кітаязнаўства імя Канфуцыя Васіль Стражаў; дырэктар Нацыянальнай бібліятэкі Беларусі Раман Матульскі; доктар фізіка-матэматычных навук, прафесар Мікалай Паклонскі, а таксама прафесарска-выкладчыцкі склад нацыянальных ВНУ, якія зрабілі свой уклад у падрыхтоўку і выпуск другога тома энцыклапедыі “Фізіка. Матэматыка”.
У рамках мерапрыемства дырэктар выдавецтва “Беларуская Энцыклапедыя імя П. Броўкі” Таццяна Бялова перадала ў дар Нацыянальнай бібліятэцы Беларусі першы і другі тамы “Энцыклапедыі для школьнікаў і студэнтаў” з аўтографамі аўтарскай калегіі выдання.