29 кастрычніка ў межах святкавання 400-годдзя першага беларускага “Буквара” дырэктар Нацыянальнай бібліятэкі Беларусі Раман Матульскі наведаў Бібліятэку Ганаровага таварыства Мідл Тэмпл у Лондане, дзе правёў прэзентацыю і перадаў у дар факсіміле “Буквара”.
Як вядома, адзін з захаваўшыхся да нашых дзён арыгіналаў кнігі знаходзіцца менавіта ў Бібліятэцы Мідл Тэмпл.
У рамках мерапрыемства Раман Матульскі расказаў пра выдавецкі праект і гісторыю “Буквара”, яго значнасць для беларускага народа, сустрэўся з дырэктарам Бібліятэкі Мідл Тэмпл Рэнэ Сатэрлей. Кіраўнікі абмеркавалі перспектывы супрацоўніцтва ў галіне бібліятэчнай справы, правядзення сумесных навуковых праектаў і даследаванняў.
На мерапрыемстве прысутнічалі гісторыкі-славісты, супрацоўнікі бібліятэкі, прадстаўнікі дыпламатычнага корпуса і беларускай дыяспары, эксперты, прадстаўнікі Брытанскай бібліятэкі, якім дырэктар Нацыянальнай бібліятэкі Беларусі перадаў у дар калекцыю беларускіх кніг у рамках праекта “Беларусь сёння”.
Таксама Раман Матульскі для студэнтаў, гісторыкаў і мовазнаўцаў Школы славянскіх і ўсходнееўрапейскіх даследаванняў Універсітэцкага каледжа Лондана прачытаў лекцыю пра Нацыянальную бібліятэку Беларусі, кніжную культуру нашай краіны і значнасць захавання культурных каштоўнасцей, пазнаёміў слухачоў з выдавецкімі праектамі Нацыянальнай бібліятэкі па факсімільным узнаўленні каштоўных кніжных помнікаў Беларусі.
Пасля заканчэння мерапрыемства Раман Матульскі перадаў у дар бібліятэцы Школы славянскіх і ўсходнееўрапейскіх даследаванняў факсімільныя выданні “Буквар” і “Кніжная спадчына Францыска Скарыны”, а таксама кнігі з фонду Нацыянальнай бібліятэкі Беларусі, прысвечаныя беларускай культуры, мове і літаратуры.
Напрыканцы мерапрыемства адбылася аглядная экскурсія па Універсітэцкім каледжы Лондана і сустрэча з дырэктарам Школы славянскіх і ўсходнееўрапейскіх даследаванняў Дыянай Каенкер, падчас якой кіраўнікі абмяняліся думкамі аб перспектыўных напрамках супрацоўніцтва, падзяліліся вопытам у сферы бібліятэчнай справы, а таксама азнаёміліся з памяшканнямі, выстаўкамі, сховішчам і рэдкімі выданнямі бібліятэкі.
Візіт адбыўся пры арганізацыйнай падтрымцы Пасольства Рэспублікі Беларусь у Злучаным Каралеўстве Вялікабрытаніі і Паўночнай Ірландыі.
Партнёрамі па факсімільным узнаўленні першага ў свеце “Буквара” выступілі Бібліятэка Ганаровага таварыства Мідл Тэмпл у Лондане, Пасольства Рэспублікі Беларусь у Злучаным Каралеўстве Вялікабрытаніі і Паўночнай Ірландыі, Міністэрства культуры Рэспублікі Беларусь, Міжнародная асацыяцыя беларусістаў, Беларускі дзяржаўны ўніверсітэт, Міністэрства адукацыі Рэспублікі Беларусь, Еўрапейскі банк рэканструкцыі і развіцця, а таксама Беларускі банк развіцця і рэканструкцыі “Белінвестбанк”, якія аб’ядналі намаганні для паспяховай рэалізацыі праекта.
Ужо заўтра, 30 кастрычніка, Раман Матульскі наведае Еўрапейскі банк рэканструкцыі і развіцця, сустрэнецца з яго прэзідэнтам сэрам Сумой Чакрабарці і перадасць у дар першы беларускі “Буквар”, факсімільнае выданне якога стала магчымым дзякуючы фінансавай падтрымцы банка.