Да 75-годдзя Вялікай Айчыннай вайны віртуальная чытальная зала пачынае серыю навін аб краязнаўчых электронных рэсурсах, прысвечаных вайне.
Інфармацыйны праект “Вайна. Памяць. Пошук” створаны пошукава-даследчым краязнаўчым цэнтрам ЦБС Асіповіцкага раёна Магілёўскай вобласці, у ім беражліва сабраны дакументальныя сведчанні пра вайну і яе ўдзельнікаў, звязаных з тэрыторыяй раёна.
Ах, ратный труд – опасная работа,
Не всех ведёт счастливая звезда.
Всегда с войны домой приходит кто-то,
А кто-то не приходит никогда.
Ю. Друніна
Тэма Вялікай Айчыннай вайны шчымлівай струной адгукаецца ў душы кожнага жыхара Беларусі. Усё менш застаецца яе непасрэдных удзельнікаў, якія абаранялі і перажылі гэта ліхалецце. У вёсках, раёнах, гарадах ёсць памятныя мясціны, звязаныя з трагічнымі і гераічнымі падзеямі тых часоў. Многія з іх ужо даследаваны і апісаны. Але застаюцца яшчэ безыменныя подзвігі, забытыя імёны і пропускі ў спісах. Праект “Вайна. Памяць. Пошук” і закліканы аднаўляць і вяртаць іх з забыцця, захоўваючы дакументальную памяць пра вайну і перадаючы яе новаму пакаленню.
Інфармацыя ў рэсурсе размеркавана па некалькіх напрамках: спісы тых, хто загінуў, хто вярнуўся з фронту, даныя аб ордэнах і ардэнаносцах, сямейныя гісторыі таго часу пра жыхароў раёна. Са старонак успамінаў, лістоў з фронту, сямейных хронік даўнія падзеі набліжаюцца да нас, даючы магчымасць адчуць той час праз ажыўшую памяць сэрца.
Перайсці на старонкі праекта можна на партале Нацыянальнай бібліятэкі Беларусі з віртуальнай чытальнай залы (“Электронныя інфармацыйныя рэсурсы ВЧЗ” – “Рэсурсы арганізацый-партнёраў...” – “Магілёўская вобласць”) або з раздзелаў вэб-навігатара “Беларусь у інфармацыйнай прасторы” (“Рэсурсы бібліятэк”, “Год малой радзімы”).
Матэрыял прадастаўлены аддзелам карпаратыўнага ўзаемадзеяння.