З 17 па 21 красавіка на базе Усерасійскай дзяржаўнай бібліятэкі замежнай літаратуры імя М.І. Рудаміно (Масква) і Цэнтральнай гарадской публічнай бібліятэкі імя У.У. Маякоўскага (Санкт-Пецярбург) прайшло вочнае навучанне маладых бібліятэкараў у рамках міжнароднага форуму “Бібліятэчны дыялог краін СНД”. Тэма 2023 года – “Бібліятэкары – паслы культуры”.
У праграме ўзялі ўдзел маладыя бібліятэкары з 7 краін СНД (з нацыянальных бібліятэк Азербайджана, Арменіі, Беларусі, Казахстана, Кыргызстана, Таджыкістана, Узбекістана) і 15 рэгіёнаў Расіі. Нацыянальную бібліятэку Беларусі прадставілі Святлана Кажамяка, загадчыца сектара арганізацыі кніжных выстаў аддзела галерэйна-выставачнай дзейнасці, і Вікторыя Зыгмантовіч, метадыст аддзела карпаратыўнага ўзаемадзеяння.
У рамках насычанай праграмы форуму прайшлі лекцыі, прэзентацыі, майстар-класы і круглыя сталы ў бібліятэках і музеях Масквы і Санкт-Пецярбурга. Асноўнымі тэмамі дыялогу сталі: роля бібліятэк у жыцці грамадства, іх дзейнасць па захаванні і прымнажэнні культурнай спадчыны ва ўмовах глабалізацыі, магчымасці супрацоўніцтва і ўдзелу бібліятэк краін СНД у міжнародных праграмах і прафесійных асацыяцыях.
Удзельнікі дыялогу абмеркавалі ролю бібліятэк у захаванні гістарычнай памяці і выхаванні адказнасці за гэта ў маладога пакалення. Падчас інтэрактыўнай лекцыі-практыкуму “Гісторыю робяць людзі” быў прадстаўлены электронны рэсурс “Бібліятэкі – сведкі Перамогі”, створаны Бібліятэкай замежнай літаратуры ў супрацоўніцтве з шэрагам бібліятэк краін СНД. Рэспубліка Беларусь прадстаўлена трыма гісторыямі выбітных людзей, якія сустрэлі Перамогу, калі працавалі ў Дзяржаўнай бібліятэцы БССР імя У.І. Леніна. Святлана Кажамяка пазнаёміла слухачоў з аўтабіяграфіяй Ігара Валянцінавіча Жолудзева, выдатнага савецкага бібліятэкара, загадчыка аддзела замежнай літаратуры і міжнароднага кнігаабмену.
Ключавым мерапрыемствам бібліятэчнага дыялогу стаў VI Міжнародны форум “Фарміруючы будучыню бібліятэк”. Падчас форуму ўдзельнікі абмеркавалі змест дакумента “Справаздача ІФЛА аб тэндэнцыях развіцця 2022 / TrendReport IFLA 2022” датычна дзейнасці і патрэб бібліятэк краін СНД і яго асноўныя раздзелы: “Натхняць”, “Далучаць”, “Падтрымліваць” і “Аб’ядноўваць”.
Напрыканцы форуму былі падведзены вынікі міжнароднага творчага конкурсу на тэму культурна-гістарычнай спадчыны краін СНД “Ніці культуры – 2023”. Конкурс праводзіцца ўжо другі год і закліканы стаць міжнароднай платформай для камунікацыі, абмену вопытам і стымулявання ўсвядомленага турызму і раскрыцця ўнікальнасці культурнай спадчыны і тэрыторый краін СНД. Яго намінантамі сталі 30 маладых “бібліятэкараў – паслоў культуры”. Дэлегаты НББ прадставілі на суд журы эсэ пра кніжны помнік эпохі Асветы – лацінамоўную паэму Мікалая Гусоўскага “Песня пра зубра” і эсэ пра нематэрыяльны культурны аб’ект “Будслаўскі фэст”. Былі вызначаны імёны трох пераможцаў, а таксама пераможцы ў асобных намінацыях. У адной з іх – “Нацыянальныя святы” – была адзначана праца Вікторыі Зыгмантовіч пра будслаўскіх пілігрымаў.
У дар Нацыянальнай бібліятэцы Беларусі ад Бібліятэкі замежнай літаратуры былі перададзены выданні, апублікаваныя ў рамках праектнай дзейнасці “Сусветная білінгвальная бібліятэка сучаснай літаратуры”. Гэта альманахі, комікс, перакладныя выданні, створаныя па выніках творчых конкурсаў і праектаў, накіраваных на развіццё і падтрымку сучасных маладых аўтараў, перакладчыкаў, рэдактараў і дзеячаў культуры.
Нацыянальная бібліятэка Беларусі выказвае словы падзякі за магчымасць удзелу ў такой значнай для бібліятэчнай супольнасці падзеі і спадзяецца на працяг супрацоўніцтва ў рамках адукацыйных праектаў такога фармату.
Матэрыял пададзены аддзелам карпаратыўнага ўзаемадзеяння і аддзелам галерэйна-выставачнай дзейнасці.
