У Нацыянальнай бібліятэцы Беларусі прайшоў міжнародны круглы стол, прысвечаны 150-годдзю з дня нараджэння Лесі Украінкі.
Леся Украінка – знакамітая ўкраінская пісьменніца, аўтар вядомых паэтычных, празаічных і драматычных твораў. Сёлета ўвесь свет адзначае 150-годдзе з дня яе нараджэння, якое ўнесена ў каляндар памятных дат ЮНЕСКА.
З прывітальнымі словамі выступілі прадстаўнікі ўстаноў-суарганізатараў: намеснік генеральнага дырэктара Нацыянальнай бібліятэкі Беларусі Алесь Суша і саветнік-пасланнік Пасольства Украіны ў Рэспубліцы Беларусь Вольга Цімуш.
Падчас міжнароднага круглага стала разглядаліся пытанні лёсу і творчасці знакамітай паэтэсы, яе мастацкай спадчыны, дзейнасць дзяржаўных і грамадскіх устаноў па яе зберажэнні і папулярызацыі. Найвялікшую цікавасць выклікалі пытанні беларускіх кантактаў Лесі Украінкі, яе мінскія адрасы і ўшанаванне імя і творчасці паэтэсы ў Беларусі.
Сваімі найноўшымі даследаваннямі падзяліліся айчынныя навукоўцы і спецыялісты з Міністэрства адукацыі Рэспублікі Беларусь (Алена Бармоціна), Нацыянальнай акадэміі навук Беларусі (Таццяна Пякуцька-Вабішчэвіч), Беларускага дзяржаўнага ўніверсітэта (Ігар Запрудскі), літаратурнага часопіса “Полымя” (Мікола Трус), а таксама Мінскага грамадскага аб’яднання ўкраінцаў “Заповіт” (Галіна Калюжная).
З украінскага боку выступілі даследчыкі з Валынскага нацыянальнага ўніверсітэта імя Лесі Украінкі, Нацыянальнай бібліятэкі Украіны імя У.І. Вярнадскага, Львоўскага нацыянальнага ўніверсітэта імя Івана Франка, Інстытута ўкраіназнаўства імя І. Крыпякевіча НАН Украіны.
Матэрыял пададзены інфармацыйна-аналітычным аддзелам.