3 мая ў Каралеўскай нацыянальнай бібліятэцы Нідэрландаў (г. Гаага) адбыліся прэзентацыя і цырымонія дарэння факсімільнага выдання “Кніжная спадчына Францыска Скарыны”.
Шматтомнае факсіміле “Кніжная спадчына Францыска Скарыны” прэзентаваў дырэктар Нацыянальнай бібліятэкі Беларусі Раман Матульскі. У сваім выступленні ён падкрэсліў значнасць для Беларусі і ўсёй сусветнай супольнасці выхаду ў свет унікальнага выдання, на падрыхтоўку якога пайшло пяць гадоў. Міжнародны выдавецкі праект па ўзнаўленні кніжнай спадчыны беларускага першадрукара быў ажыццёўлены сумесна з Банкам БелВЭБ і стаў стрыжнем юбілейных мерапрыемстваў, прысвечаных 500-годдзю беларускага кнігадрукавання.
Пасля прэзентацыі Раман Матульскі перадаў каштоўны шматтомнік намесніку генеральнага дырэктара Каралеўскай нацыянальнай бібліятэкі Нідэрландаў Марку ван дэн Бергу.
У рамках сустрэчы нідэрландскі бок прэзентаваў выданні з фондаў галоўнай бібліятэкі Нідэрландаў, якія маюць дачыненне да дзейнасці Эразма Ратэрдамскага і перакладу Бібліі на галандскую мову ў Сярэднія вякі. Нідэрландскую калекцыю прадставіла спадарыня Марыйке ван Дэлфт.
У мерапрыемстве прынялі ўдзел Надзвычайны і Паўнамоцны Пасол Рэспублікі Беларусь у Каралеўстве Нідэрландаў Мікалай Барысевіч і саветнік па палітычных, консульскіх і пратакольных пытаннях Мікалай Кернажыцкі.
