20 сакавіка ў рамках Года малой радзімы Віцебская абласная бібліятэка імя У.І. Леніна сумесна з Нацыянальнай бібліятэкай Беларусі правялі семінар “Бібліятэкі і кніжная культура Беларусі: з мінулага ў будучыню”.
У мерапрыемстве прынялі ўдзел кіраўнікі бібліятэк Віцебскай вобласці, прадстаўнікі музеяў, навучальных і іншых устаноў.
У рамках семінара дырэктар Нацыянальнай бібліятэкі Беларусі, доктар педагагічных навук, прафесар Раман Матульскі выступіў з адкрытай лекцыяй “Тэндэнцыі і асаблівасці развіцця кніжнай культуры Беларусі ў XI –XX стст. у кантэксце агульнаеўрапейскай і нацыянальнай гісторыі”.
У першай частцы свайго дакладу Раман Сцяпанавіч прадставіў развіццё кніжнай і бібліятэчнай справы на тэрыторыі Беларусі з ХІ да пачатку ХХ ст. на фоне асноўных падзей агульнаеўрапейскай і нацыянальнай гісторыі.
У другой частцы выступу Р.С. Матульскі прадэманстраваў вынікі глыбокага аналізу вялікай колькасці дакументальных і статыстычных даных, якія адлюстроўваюць развіццё бібліятэчнай і выдавецкай справы Беларусі ў савецкі перыяд (1917–1991).
Лекцыя выклікала жывую цікавасць у слухачоў. Удзельнікі абмеркавалі шэраг пытанняў, якія тычацца як гісторыі развіцця бібліятэк, так і іх сучаснага стану.
У ходзе мерапрыемства ў рамках акцыі “Чытанне – прастора інфармацыі і ведаў” Раман Матульскі перадаў бібліятэкам Віцебскай вобласці 950 экзэмпляраў кніг. Фонды бібліятэк Віцебшчыны папоўніліся творамі класікаў сусветнай мастацкай літаратуры і сучасных аўтараў, даведачнымі і энцыклапедычнымі выданнямі, навукова-папулярнай і вучэбна-метадычнай літаратурай.
Матэрыял прадастаўлены навукова-даследчым аддзелам бібліятэказнаўства.
