Нацыянальная бібліятэка Беларусі прыняла ўдзел у фестывалі “Горад і кнігі”. На дзіцячай пляцоўцы прайшлі заняткі “Партрэт першадрукара”.
“Партрэт першадрукара” – інтэрактыўныя творчыя заняткі, на якіх быў прадстаўлены праект Нацыянальнай бібліятэкі Беларусі “Клуб кніжных прафесараў”.
Удзельнікі заняткаў убачылі шматлікія партрэты, створаныя ў XVI–XXI стагоддзях, а потым і самі ўзяліся за творчую працу. Яны зрабілі тантамарэскі – яркія стэнды для фатаграфій з адтулінай для твару. У выніку кожны ўдзельнік ненадоўга прымерыў на сябе вобраз беларускага першадрукара.
Матэрыял прадастаўлены навукова-даследчым аддзелам кнігазнаўства.
