Традыцыйна ў сярэдзіне чэрвеня ў Расійскай нацыянальнай бібліятэцы адбылася XXVII штогадовая канферэнцыя “Санкт-Пецярбург і беларуская культура”, арганізаваная сумесна з Санкт-Пецярбургскай асацыяцыяй беларусістаў.
У якасці праблемнага поля канферэнцыі разглядаліся расійска-беларускія культурныя сувязі, помнікі беларускай гісторыі і кніжнай культуры з фондаў бібліятэк і архіваў, аспекты музычнай і мастацкай культуры, літаратурнага жыцця, біяграфіі грамадскіх дзеячаў і іншыя пытанні.
У рабоце навуковага мерапрыемства прыняў удзел галоўны бібліёграф Нацыянальнай бібліятэкі Беларусі Андрэй Бараноўскі з дакладам “Невядомы рукапіс абаронцы Ленінграда”. Падчас выступу ён перадаў у дар Расійскай нацыянальнай бібліятэцы сваю кнігу “Лепельское пехотное училище” (Смаленск, 2018), адным з герояў якой з’яўляецца перадваенны выпускнік вучылішча палкоўнік Міхаіл Рыгоравіч Герасіменка (1920–2014), ураджэнец Беларусі, удзельнік абароны Ленінграда, аўтар рукапісных успамінаў пра тыя незабыўныя падзеі.
У адпаведнасці з пажаданнем спадчыннікаў М.Р. Герасіменка і ў гонар 75-годдзя зняцця блакады горада на Няве рукапіс “Пути-дороги сложные: воспоминания участника обороны Ленинграда” і яго лічбавая копія таксама былі перададзены А. Бараноўскім ў фонды Расійскай нацыянальнай бібліятэкі.
Матэрыял прадастаўлены навукова-даследчым аддзелам бібліяграфіі.
