13 верасня па ініцыятыве абласной універсальнай бібліятэкі на Гомельшчыне ўпершыню правялі абласную акцыю “Ноч у бібліятэцы”.
Яна атрымала назву “Ноч майстроў” і была прысвечана раману Міхаіла Булгакава “Майстар і Маргарыта”.
Хоць і ішоў дождж, але тэатралізаваная прадмова сабрала каля тысячы (а паводле даных сайта “Онлайнер. Гомель” – амаль дзве тысячы) гамяльчан і гасцей абласнога цэнтра.
Ролі герояў Булгакава сыгралі супрацоўнікі бібліятэкі – акцёры народнага аматарскага тэатра “Гракі”: Воланда – Юрый Максіменка, Кароўева – Юрый Рачынскі, Бегемота – Віталь Сядзько, Азазэла – Ілья Верхаводка, Маргарыту – Ірына Студнева, Майстра – Сяргей Галомзік.
Калі гадзіннік прабіў апоўнач, таямнічы голас абвясціў: “Вялікі раман Булгакава заканчваецца ў Маскве, на тэрасе Пашкова дома, цяпер – Расійскай дзяржаўнай бібліятэкі, у далёкім 1929 годзе. А сёння, у ХХІ стагоддзі, Воланд са світай наведвае галоўную бібліятэку Гомеля і нашай вобласці!”
Воланд: Цікавы горад, ці не праўда?
Кароўеў: Месір, мне больш падабаецца Рым!
Воланд: Ну, гэта справа густу. А што за шум у Доме Грыбаедава?
Бегемот: Гэта гомельскія бібліятэкары рыхтуюцца да свайго прафесійнага свята. Сёння ў іх – Ноч у бібліятэцы!
Воланд: Я з задавальненнем правёў бы ноч у бібліятэцы! Памятаеце, як я прыехаў у Маскву, каб разабраць у Дзяржаўнай бібліятэцы рукапісы Герберта Аўрылакскага?
Кароўеў: Даруйце, месір, але ж вы іх не разабралі.
Бегемот: Фагот, у месіра бракавала часу: ён быў заняты масквічамі.
Кароўеў: А цяпер не пашкодзіла б заняцца гамяльчанамі.
Воланд: А што цяпер чытае сучасны люд?
Кароўеў: Усё больш айпады, ды слухае аўдыякнігі…
Воланд: А гамяльчане кнігі чытаюць?
Кароўеў: Пакуль чытаюць. І гэта радуе…
Дык што ж было той ноччу ў абласной бібліятэцы? У фае разгарнулася выстаўка котак “Кот Бегемот і родзічы”, арганізаваная Гомельскім гарадскім аддзяленнем Беларускай асацыяцыі “Фелінолаг”. Месір Воланд назваў лепшую.
У Музеі рэдкай кнігі размясціўся фотасалон “У Воланда”. Натуральна, большасць наведвальнікаў жадала сфатаграфавацца менавіта з месірам. А тым часам загадчык аддзела рэдкай кнігі Дзіна Мельнічэнка знаёміла ахвотных з кніжнымі рарытэтамі.
Кавярня ж бібліятэкі стала на час “Домам Грыбаедава”, дзе выступілі гомельскія музыкі і паэты, у прыватнасці, салісты студыі “Рэтра”, акцёр Аляксей Бычкоў, які прэзентаваў інсцэніраваны ўрывак са сваёй п’есы, прысвечанай Мікалаю Румянцаву…
У чытальнай зале працавала выстаўка гомельскага мастака Сяргея Каўрыгі “Ад Аэліты да Маргарыты”. Варта дадаць, што карціна творцы ўвайшла ў дзясятку самых незвычайных мастацкіх работ на леташнім “Славянскім базары ў Віцебску”.
Аддзел перыядычных выданняў пераўтварыўся ў “нядобрую кватэру № 50”, дзе гомельскія студэнты ды навучэнцы пагулялі ў літаратурны квэст.
На трэцім паверсе новага бібліятэчнага корпуса працаваў дамскі салон, які ўладкавалі супрацоўнікі бібліятэкі, касметычнай фірмы і салона вячэрніх і вясельных сукенак. Для дэфіле было падрыхтавана шэсць прэтэндэнтак на ролю Маргарыты, што была выбрана на балі ў Воланда. А сам баль, дзе арганічна спалучыліся паэзія і арфаграфія (цудоўная работа студыі тэатра і танца “Livень”), паставіў яркую запамінальную кропку Ночы майстроў.
Бібліяноч доўжылася дзве гадзіны, да 23-й. Воланду з яго світай было шкада развітвацца з Гомелем: “Цудоўны горад – чытаючы горад! У тым мы сёння пераканаліся не раз”. Але пачулася ржанне коней, і месір пад апладысменты гледачоў знік…
Аўтар публікацыі: Юрый Максіменка, вучоны сакратар Гомельскай абласной універсальнай бібліятэкі.
Крыніца: газета “Культура”, 28.09.2013
Чытайце таксама: