З 4 кастрычніка па 10 снежня ў Нацыянальнай бібліятэцы Беларусі (2-гі паверх, кальцавы калідор) арганізавана выстаўка “Культура Беларусі: традыцыі і перспектывы”, прысвечаная Дню работніка культуры.
Беларуская культура захавала сваю ўнікальнасць і належыць да агульнаеўрапейскай культурнай спадчыны і сучаснай сусветнай культуры. Развіццё культуры сёння з’яўляецца адным з прыярытэтаў дзяржаўнай палітыкі. Культура – душа, гонар і слава беларускага народа, яна аб’ядноўвае і ўзвышае нацыю, застаецца вечнай каштоўнасцю чалавецтва.
У прапанаванай экспазіцыі прадстаўлена каля 200 дакументаў, сярод іх – даведачныя і энцыклапедычныя выданні, манаграфіі, альбомы, буклеты, якія расказваюць пра гісторыю і сучасны стан культуры нашай краіны.
Асобным з’яўляецца раздзел выстаўкі “Магілёў – культурная сталіца Беларусі 2013 года”, прысвечаны цудоўнаму гораду, які стаў пятым (пасля Віцебска, Полацка, Гомеля і Нясвіжа), атрымаўшым ганаровы статус культурнай сталіцы Беларусі.
Прытрымліваючыся сваіх слаўных традыцый, Магілёў заўсёды быў і застаецца высокаразвітым цэнтрам не толькі асветы, адукацыі, але культуры і духоўнасці. У горадзе дзейнічаюць тэатры (драматычны і лялечны), абласныя музеі (краязнаўчы і мастацкі), кінатэатры, гарадскія бібліятэкі, школы мастацтваў, палацы, дамы культуры і клубы. Яркімі падзеямі ў культурным жыцці Магілёва сталі буйныя культурныя мерапрыемствы, сярод якіх міжнародныя музычныя фестывалі “Залаты шлягер” і “Магутны Божа”, міжнародны маладзёжны тэатральны форум “Март-кантакт”, міжнародныя фестывалі дзіцячай творчасці “Залатая пчолка” і народнай творчасці “Вянок сяброўства”.
Выстаўка будзе цікавай для шырокага кола чытачоў і наведвальнікаў бібліятэкі.
Кантактны тэлефон: (8 017) 293 28 86.