Мемарыяльны літаратурны музей Якуба Коласа занесены сумётамі. А ў самім музеі, акрамя пастаяннай экспазіцыі, дэманструецца выстава ілюстрацый вядомага графіка, прафесара, лаўрэата Дзяржаўнай прэміі Беларусі Васіля Шаранговіча да паэмы “Новая зямля” і іншых твораў класіка.
Якуб Колас – адзін з лепшых прыродаапісальнікаў у беларускай літаратуры, які вельмі тонка і пранікнёна апявае беларускія краявіды, яго прыродаапісальная лірыка кранае чытачоў рознага ўзросту. Кожная пара года ў яго творчасці апісана хораша і рэалістычна. Вось як трапна перадае паэт зімовую пару на старонках “Новай зямлі”:
Мароз паважны, як вяльможа,
Знасіць свавольніцтва не можа,
І на той час, як ён пануе,
Па небе хмарка не вандруе,
І ўсё стварэнні занямеюць,
І патыхаць вятры не смеюць.
Радкі з паэмы – “Уладарства холаду вяліка” – далі назву экспазіцыі ілюстрацый Васіля Шаранговіча. Мастаку заўсёды цікава перачытваць творы класіка літаратуры і рабіць свае акварэльныя і графічныя малюнкі.
Васіль Пятровіч нарадзіўся зімовай парой, 14 студзеня яму споўнілася 82 гады. Вопытнаму графіку даступныя разнастайныя тэхнікі афармлення кніг, зразумелая структура і вобразы твора, псіхалогія і настрой персанажаў.
Народны паэт і народны мастак Беларусі аднолькава яскрава перадаюць непаўторную зімовую прыгажосць, хараство зімы ў сваёй творчасці.
Падрыхтавала Э. Дзвінская, фота аўтара.