14 лістапада – 115 гадоў з дня нараджэння беларускага паэта, члена Саюза пісьменнікаў СССР, грамадскага дзеяча Міхася Васілька (сапраўднае імя Міхась Восіпавіч Касцевіч).
Міхась Васілёк – з кагорты сялянскіх паэтаў, якія прайшлі складаны жыццёвы шлях і якіх закранулі падзеі гісторыі нашай айчыны ў XX стагоддзі.
Паэт пакінуў нам невялікую спадчыну. Але яго паэзія шчырая, самабытная, яна ўнесла значны ўклад у развіццё беларускай літаратуры, у адлюстраванне гістарычных падзей (“Як калісьці”, “Наш дзень”, “Не плач, душа” і іншыя).
Нарадзіўся паэт у 1905 г. у вёсцы Баброўня Гарадзенскага раёна ў сям’і лесніка. Сярэднюю адукацыю атрымаў у 1921 г. у Казлове (Мічурынску), дзе разам з бацькамі быў у бежанстве. Там страціў маці, якая хварэла на сухоты.
У 1922 г. вярнуўся на радзіму. Працаваў на гаспадарцы батраком. Уступіў у Беларускую сялянска-рабочую грамаду. Арганізоўваў гурткі Таварыства беларускай школы. Неаднаразова арыштоўваўся польскімі ўладамі і трапляў у турму.
У 1926–1928 гг. служыў у войску ў Гародні.
З 1926 г. пачаў друкаваць свае вершы ў Віленскіх выданнях, працаваў у заходнебеларускім часопісе “Маланка”. Яго вершы друкаваліся таксама ў часопісах “Родныя гоні”, “Літаратурная старонка”, “Уздым”, “Маладая Беларусь”, “Калоссе” і інш.
Першы зборнік лірыкі “Шум баравы” (1929, Вільня) быў таксама канфіскаваны паліцыяй. Рукапіс другога – канфіскаваны і знішчаны (1934). У 1937 г. у Вільні выйшаў зборнік “З сялянскіх ніў”.
У 1939 г. Міхась Васілёк быў мабілізаваны ў польскае войска, удзельнічаў у вайне Польшчы з Германіяй. Трапіў у нямецкі палон, вёў патрыятычныя гутаркі і асвету сярод палонных беларусаў. У жніўні 1941 г. збег з палону, вярнуўся на радзіму і актыўна ўключыўся ў партызанскую барацьбу.
Пасля Вялікай Айчыннай вайны працаваў літкансультантам у абласной газеце “Гродзенская праўда”. У 1945 г. ён стаў членам Саюза пісьменнікаў СССР.
У другой палове XX стагоддзя былі выдадзены кнігі паэзіі “Выбраныя вершы” (1950), “Выбраныя творы” (1955), “Зоры над Нёманам” (1963), “Вершы” (1973).
Міхась Васілёк памёр у Гродне 3 верасня 1960 г. Пахаваны на праваслаўных гродзенскіх могілках.
Матэрыял пададзены цэнтрам алічбоўкі і забеспячэння захаванасці бібліятэчных дакументаў.