Зоя Леанідаўна Елісавецкая нарадзілася 3 жніўня 1928 года ў Кіеве ў сям’і служачага.
Дзяцінства ў яе было нялёгкім. Яна рана страціла бацьку, рэпрэсаванага ў 1937 годзе. У ваенны час разам з маці і сястрой знаходзілася ў эвакуацыі ў Паволжы.
Пасля вучобы ў школе дзяўчына паступіла на гістарычны факультэт Львоўскага дзяржаўнага ўніверсітэта, які скончыла з адзнакай ў 1952 годзе. Затым больш за 10 гадоў працавала настаўнікам гісторыі ў школе горада Гарадок Львоўскай вобласці.
1947 год
Шлях Зоі Леанідаўны ў бібліятэчную прафесію пачаўся ў 1963 годзе ў бібліятэцы ваеннага гарадка Вернойхен у Германскай Дэмакратычнай Рэспубліцы, куды яна пераехала па месцы службы мужа ў Групе савецкіх войскаў у Германіі. Праз два гады яе прызначаюць на пасаду загадчыцы бібліятэкі гарнізоннага Дома афіцэраў.
Бібліятэка Дома афіцэраў горада Вернойхен (ГДР).
1966 год.
У 1970 годзе сям’я пераязджае ў Мінск. У студзені 1971 года Зою Леанідаўну прымаюць на працу бібліятэкарам у Дзяржаўную бібліятэку БССР імя У.І. Леніна (цяпер – Нацыянальная бібліятэка Беларусі).
Уся яе далейшая працоўная дзейнасць была звязана з навукова-бібліяграфічным аддзелам (пазней – аддзел рэкамендацыйнай бібліяграфіі), які яна ўзначаліла ў студзені 1977 года. Прафесійныя абавязкі Зоя Леанідаўна таксама ўмела сумяшчала з грамадскай працай, абіралася сакратаром партыйнай арганізацыі бібліятэкі.
На працоўным месцы. 1978 год
Шмат гадоў разам са сваімі калегамі Зоя Леанідаўна Елісавецкая займалася складаннем і рэдагаваннем бюлетэня “Новыя кнігі БССР” (цяпер – “Новыя кнігі: па старонках беларускага друку”).
Працуючы загадчыцай навукова-бібліяграфічнага аддзела, яна была добрым і мудрым настаўнікам для маладых калег, карысталася заслужаным аўтарытэтам і павагай сярод супрацоўнікаў бібліятэкі. Прафесіяналізм і добрасумленная праца З.Л. Елісавецкай былі адзначаны ганаровымі граматамі Міністэрства культуры БССР (1977, 1978), Ганаровай граматай Міністэрства культуры СССР (1982), а таксама медалём “Ветеран труда” (1985).
У 1985 годзе Зоя Леанідаўна выйшла на пенсію, але працягвала працаваць у сваім аддзеле да чэрвеня 1995 года.
Супрацоўнікі аддзела рэкамендацыйнай бібліяграфіі віншуюць Зою Леанідаўну з 70-гадовым юбілеем.
1998 год
Сустрэча з любімымі сябрамі-калегамі.
Злева направа: А.І. Леў, Т.Я. Мамедава, З.Л. Елісавецкая, М.А. Каваленка
Скончыла свой жыццёвы шлях Зоя Леанідаўна ў студзені 2018 года, крыху не дажыўшы да свайго 90-годдзя.
Бібліятэка выказвае падзяку сыну З.Л. Елісавецкай, Аляксандру Усеваладавічу, за супрацоўніцтва пры стварэнні публікацыі.
Матэрыял пададзены навукова-даследчым аддзелам бібліяграфіі.
Пра ветэранаў і супрацоўнікаў Нацыянальнай бібліятэкі Беларусі чытайце ў рубрыцы “Партрэты: гісторыя бібліятэкі ў асобах”.