У маі 2024 года Рэспубліка Беларусь адзначае 70-годдзе свайго ўступлення ў арганізацыю Аб’яднаных Нацый па пытаннях адукацыі, навукі і культуры (ЮНЕСКА).
Да гэтай знамянальнай даты Віртуальны цэнтр па дзейнасці міжнародных арганізацый прадстаўляе праект “ЮНЕСКА і Беларусь: этапы плённага ўзаемадзеяння”.
ЮНЕСКА – важны партнёр Беларусі ў вырашэнні задач у сацыякультурнай сферы, а таксама ўнікальная платформа для прапаганды дасягненняў у галіне культуры, навукі, адукацыі і інфармацыйных тэхналогій, папулярызацыі знешнепалітычных ініцыятыў дзяржавы і развіцця ўзаемавыгадных двухбаковых кантактаў.
Праект адлюстроўвае ўсю 70-гадовую гісторыю супрацоўніцтва нашай Рэспублікі з Арганізацыяй Аб’яднаных Нацый па пытаннях адукацыі, навукі і культуры (ЮНЕСКА).
У аснову арганізацыі матэрыялаў праекта пакладзены прынцып лангрыда, які прадугледжвае глыбокае пагружэнне карыстальніка ў тэму. У адзіны комплекс аб’яднаны тэкставыя матэрыялы, спісы літаратуры, ілюстрацыі, фотагалерэі, храналагічныя пералікі падзей.
Праект складаецца з 10 раздзелаў, у кожным з якіх прадстаўлена тэкставая і візуальная інфармацыя па тэме, а таксама спісы літаратуры, якія ўключаюць кнігі, дысертацыі, артыкулы з часопісаў і зборнікаў, перыядычныя выданні, электронныя рэсурсы, аўдыя- і відэадакументы з фондаў Нацыянальнай бібліятэкі Беларусі з указаннем шыфраў захоўвання, а таксама гіперспасылкі на поўныя тэксты дакументаў.
Для кожнага раздзела маецца ўступны артыкул, які раскрывае асноўныя напрамкі дзейнасці ў рамках дадзенай тэмы. Артыкулы суправаджаюцца візуальнай інфармацыяй – ілюстрацыямі, фатаграфіямі з архіва бібліятэкі, лічбавымі копіямі вокладак найбольш цікавых выданняў, а таксама храналагічнымі пералікамі канферэнцый, якія праходзілі ў Беларусі пры ўдзеле ЮНЕСКА і спісамі рэалізаваных праектаў (часавы ахоп з 1990-х гг. па сёння).
Праект можа быць карысны студэнтам, выкладчыкам, даследчыкам у галіне міжнароднага права і міжнародных адносін, а таксама ўсім, хто цікавіцца дзейнасцю міжнародных арганізацый і пытаннямі знешняй палітыкі Рэспублікі Беларусь.
Запрашаем чытачоў і віртуальных карыстальнікаў на старонку Віртуальнага цэнтра па дзейнасці міжнародных арганізацый.
З 8 мая па 18 чэрвеня ў аддзеле абслугоўвання афіцыйнымі дакументамі (пам. 207) адкрыта тэматычная кніжная выстава “ЮНЕСКА і Беларусь: 70 гадоў паспяховага супрацоўніцтва”, прысвечаная 70-годдзю ўступлення Рэспублікі Беларусь у ЮНЕСКА.
Матэрыял пададзены аддзелам абслугоўвання афіцыйнымі дакументамі.
