28 лютага ў Нацыянальнай бібліятэцы адбылося ўрачыстае адкрыццё выстаўкі “Фантастычная вандроўка” ў межах штогадовага праекта “Гісторыя і сучаснасць кніжнай графікі”.
Першая выстаўка праекта “Illustratio. Разнастайнасць тэхнік ілюстравання” (2021) прадэманстравала шырокую панараму графічных тэхнік стварэння ілюстрацый і лепшыя ўзоры нацыянальнага кнігавыдання. Другі выставачны праект “Fashion-ілюстрацыя” (2022) прадставіў гісторыю ўзнікнення і развіцця мастацтва перадачы модных ідэй у візуальнай форме.
Новая выстаўка праекта – своеасаблівая вандроўка па гадах і краінах, па кнігах і свеце ўяўнікаў, фантазёраў, летуценнікаў, прарокаў; падарожжа па задумах, ідэях і іх увасабленні ў літаратуры і мастацтве, у тэкстах і ілюстрацыях.
У экспазіцыі “Фантастычная вандроўка” прадстаўлены выданні аўтараў ХІХ–ХХ стст., пачынаючы ад твораў вынаходнікаў і стваральнікаў жанру навуковай фантастыкі да першых знакавых твораў сучаснага фэнтэзі. Выстаўка дае магчымасць параўнаць вобразныя, стылістычныя і тэхнічныя прыёмы ўвасаблення аднаго і таго ж сюжэта рознымі кніжнымі графікамі. Дапаўняюць экспазіцыю і робяць яе больш відовішчнай і прыцягальнай работы сучасных беларускіх жывапісцаў, графікаў, скульптараў, майстроў дэкаратыўнага мастацтва, якія інтэрпрэтуюць знакамітыя фантастычныя сюжэты сусветнай культуры.
У мерапрыемстве прынялі ўдзел генеральны дырэктар Нацыянальнай бібліятэкі Беларусі Аксана Кніжнікава, дырэктар Інстытута літаратуразнаўства імя Янкі Купалы, доктар філалагічных навук, прафесар Іван Саверчанка, кандыдат філалагічных навук, пісьменнік, дактарант Інстытута літаратуразнаўства імя Янкі Купалы Марыя Кудрашова (Шамякіна), мастацтвазнаўца, арт-крытык, член Беларускага саюза мастакоў, Беларускага саюза дызайнераў Ларыса Фінкельштэйн, беларускі мастак-графік, член Беларускага саюза мастакоў, выкладчык Беларускай дзяржаўнай акадэміі мастацтваў Фёдар Шурмялёў.
Запрашаем на падарожжа па экспазіцыі “Фантастычная вандроўка”, каб зазірнуць у поўны цудаў свет, адчуць сябе героем фэнтэзі, авалодаць сапраўдным чараўніцтвам і палюбавацца, як са звыклых рэчаў – кніг і ілюстрацый – з’яўляюцца самыя незвычайныя! Крок за крокам – па мапе экспазіцыйнай прасторы.
Экспазіцыя будзе працаваць да 16 чэрвеня 2023 г.
Дата заканчэння яе працы можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Глядзіце таксама рэпартаж тэлеканала "Беларусь 1".
Матэрыял пададзены аддзелам сувязей з грамадскасцю.