...Люблю Расію да болю сардэчнага

Творчасць Міхаіла Яўграфавіча Салтыкова-Шчадрына адрозніваецца глыбокай самабытнасцю і арыгінальнасцю, і, разам з тым, у ёй знайшлі сваё наступнае развіццё лепшыя традыцыі рускага рэалізму. Міхаіл Яўграфавіч праклаў новыя шляхі ў развіцці сатыры ў рускай літаратуры. Творы пісьменніка здзіўляюць глыбінёй пранікнення ў жыццё, у свет чалавечых пачуццяў, сатырычнай вастрынёй зроку, якая ахоплівае ўсе бакі рэчаіснасці, невычэрпнай сілай патрыятычнай думкі.

Юбілейная кніжная выстаўка налічвае больш за 100 выданняў і змяшчае раманы, зборнікі апавяданняў, казкі, літаратурную крытыку, крытычныя матэрыялы да твораў пісьменніка, а таксама літаратуру пра жыццё і творчасць вялікага сатырыка.

На выстаўцы экспануецца кніга “Губернские очерки”, выпушчаная ў 1882 г. у Санкт-Пецярбургу, у друкарні А.А. Краеўскага. З прыжыццёвых выданняў прадстаўлены таксама “Дневник провинциала в Петербурге”, “Сатиры в прозе” (1885).

Акрамя таго, экспазіцыя ўключае поўны збор твораў у 12-ці тамах, выпушчаны ў 1906 г. у Санкт-Пецярбургу.

Кніга “Неизвестные страницы”, выдадзеная ў 1931 г. у Маскве выдавецтвам “ACADEMIA”, цікавая тым, што ў ёй апублікаваны ананімныя творы М.Я. Салтыкова-Шчадрына, якія выдаваліся ў 1868–1878 гг. у часопісе “Отечественные записки”. Таксама кніга змяшчае рэцэнзіі Салтыкова-Шчадрына на белетрыстычныя творы і кнігі публіцыстычнага характару.

Цікавае выданне “М.Е. Салтыков-Щедрин в восспоминаниях современников” (1975). Сабраныя ў ім успаміны маюць цэлую серыю партрэтных замалёвак Міхаила Яўграфавіча ў жыцці. Гэтыя замалёўкі вельмі розныя і па поглядзе на пісьменніка, і па манеры, і па ступені закончанасці малюнка. Яны адносяцца да розных этапаў яго жыцця і да розных сфер яго дзейнасці. У іх паказана шмат розных граняў у характары гэтага чалавека.

Выстаўка прызначана для ўсіх чытачоў, якія цікавяцца жыццём і творчасцю вядомага рускага пісьменніка-сатырыка М.Я. Салтыкова-Шчадрына.