Нацыянальная бібліятэка Беларусі прадастаўляе сваім чытачам шырокі спектр віртуальных сэрвісаў і анлайн-паслуг. Прапануем, не выходзячы з дому, скарыстацца рэсурсамі Віртуальнага цэнтра па дзейнасці міжнародных арганізацый.
Віртуальны цэнтр па дзейнасці міжнародных арганізацый – тэматычны анлайн-рэсурс бібліятэкі, адрасаваны студэнтам, выкладчыкам, спецыялістам у галіне міжнароднага права і міжнародных адносін, а таксама ўсім, хто вывучае дзейнасць міжнародных арганізацый і пытанні знешняй палітыкі Рэспублікі Беларусь.
Якія магчымасці віртуальны цэнтр прапануе сваім аддаленым карыстальнікам?
Рэкамендацыйныя спісы літаратуры, складзеныя прафесійнымі бібліёграфамі, дапамогуць даследчыкам скараціць час, неабходны для пошуку і адбору літаратуры.
У раздзеле “Актуальныя тэмы” змяшчаюцца спісы літаратуры аб новых падзеях у галіне міжнароднага права і міжнародных адносін, аб актуальных пытаннях дзейнасці міжнародных арганізацый.
Матэрыялы па гісторыі стварэння, структуры і дзейнасці міжнародных арганізацый прадстаўлены ў раздзеле “Міжнародныя арганізацыі: гісторыя і сучаснасць”.
Пытанням знешняй палітыкі Рэспублікі Беларусь прысвечаны раздзелы “Беларусь і міжнародныя арганізацыі” і “Беларусь і краіны свету”.
Бібліяграфічныя спісы ўключаюць дакументы міжнародных арганізацый, даведачную і вучэбную літаратуру, міжнародныя прававыя акты і заканадаўства Рэспублікі Беларусь, манаграфіі і артыкулы беларускіх і замежных аўтараў.
Спісы літаратуры дапоўнены гіперспасылкамі на поўныя тэксты.
Віртуальная выстаўка новых паступленняў дазволіць даведацца аб папаўненні падсобнага фонду залы дакументаў міжнародных арганізацый, нават калі ў вас няма магчымасці прыйсці ў бібліятэку. Спісы новых паступленняў размяшчаюцца на інтэрнэт-партале бібліятэкі 1–2 разы на месяц. Да кожнай кнігі даецца бібліяграфічнае апісанне, анатацыя і pdf-файл са зместам.
Наведвальнікам віртуальнага цэнтра прадастаўляецца анлайн-доступ да інфармацыйных рэсурсаў міжнародных арганізацый. У раздзеле “Інтэрнэт-навігатар” вы знойдзеце адрасы электронных бібліятэк міжнародных арганізацый, а таксама спасылкі на поўныя тэксты найбольш значных дакументаў міжнародных арганізацый (статутаў, канвенцый, дэкларацый, рэзалюцый, дакладаў, справаздач аб пасяджэннях, ключавых публікацый і інш.).
Для тых, хто імкнецца ўдасканальваць свае веды, прапануем інфармацыю пра магчымасці дыстанцыйнай адукацыі. У раздзеле “Анлайн-навучанне” публікуюцца агляды масавых адкрытых анлайн-курсаў (англ. Massive open online courses, MOOCs) па міжнародным праве, сусветнай палітыцы і эканоміцы, дзейнасці міжнародных арганізацый, распрацаваных вядучымі ўніверсітэтамі і кампаніямі свету.
Віртуальны праект “ЮНЕСКА і Беларусь: вехі супрацоўніцтва”, створаны ў 2019 годзе, знаёміць з найбольш значнымі вынікамі ўдзелу Беларусі ў дзейнасці Арганізацыі Аб’яднаных Нацый па пытаннях адукацыі, навукі і культуры.
У спісы літаратуры, падрыхтаваныя для праекта, уключаны як комплексныя, абагульняючыя даследаванні, так і матэрыялы аб супрацоўніцтве ў асобных галінах (адукацыі, навуцы, культуры, інфармацыі), а таксама аб дапамозе ЮНЕСКА ў пераадоленні наступстваў аварыі на Чарнобыльскай АЭС.
У віртуальным праекце таксама сабраны выданні беларускіх аўтараў, апублікаваныя пры падтрымцы ЮНЕСКА, публікацыі ЮНЕСКА пра Беларусь, дакументы, падрыхтаваныя Беларуссю для прадстаўлення ЮНЕСКА, зборнікі матэрыялаў канферэнцый, якія праходзілі ў Беларусі з удзелам гэтай арганізацыі.
З многімі з прапанаваных дакументаў можна азнаёміцца аддалена – па гіперспасылках на поўныя тэксты, апублікаваныя ў сетцы Інтэрнэт, або на pdf-файлы з адсканіраванымі зместамі кніг.
У паўнатэкставым відзе прадстаўлены прававыя дакументы і матэрыялы рубрыкі “Хроніка падзей”, якія публікаваліся ў часопісе “Веснік Міністэрства замежных спраў Рэспублікі Беларусь” у 1990–2009 гг.
Прапануюцца таксама матэрыялы пра тое, як з ЮНЕСКА ўзаемадзейнічаюць розныя арганізацыі і ўстановы Беларусі: Нацыянальная камісія Рэспублікі Беларусь па справах ЮНЕСКА, Нацыянальная бібліятэка Беларусі, Беларускі камітэт праграмы ЮНЕСКА “Чалавек і біясфера”, Камітэт па біяэтыцы Рэспублікі Беларусь, кафедры і клубы ЮНЕСКА і іншыя.
У раздзеле “Беларусь у Спісе памятных дат ЮНЕСКА” вы даведаецеся, юбілеі якіх дзеячаў навукі і культуры нашай краіны былі ўключаны гэтай міжнароднай арганізацыяй у лік падзей, якія маюць сусветнае або рэгіянальнае значэнне.
Віртуальныя сэрвісы Нацыянальнай бібліятэкі – гэта эканомія часу і сіл, якасная і аўтарытэтная інфармацыя ў сябе дома.
Матэрыял прадастаўлены аддзелам абслугоўвання афіцыйнымі дакументамі.
