Чытачы Нацыянальнай бібліятэкі маюць магчымасць дыстанцыйна атрымаць доступ да ліцэнзійных электронных рэсурсаў вядучых выдавецтваў па розных галінах ведаў. Гэта істотна дапаможа ў аддаленай адукацыйнай і навуковай дзейнасці.
Тэматычныя падборкі “Ахова здароўя”, “Лячэбнае справа”, “Арганізацыя аховы здароўя”, “Сястрынская справа”, “Фармакалогія”, “Фундаментальная медыцына”, прадстаўленыя ў электронна-бібліятэчнай сістэмы “БиблиоРоссика”, дапамогуць падтрымаць працэс бесперапыннай адукацыі ў сферы медыцыны. Тут жа даступны і шэраг профільных навуковых, навучальных і даведачных выданняў, у якіх вы знойдзеце актуальную інфармацыю пра вынікі навуковых даследаванняў, клінічныя пратаколы, пра сучасныя метады дыягностыкі, лячэння і прафілактыкі хвароб.
Больш за 4 тыс. кніг, часопісаў, артыкулаў, а таксама практычных дапаможнікаў для студэнтаў-медыкаў і ўрачоў-практыкаў, у тым ліку спецыялістаў вузкага профілю, месцяцца ў спецыялізаванай тэматычнай калекцыі на платформе ЭБС “Знаниум”. Доступ да калекцыі адкрыты да 1 ліпеня.
Лічбавы архіў часопісаў “Советское здравоохранение” за 1942– 1992 гады на электроннай платформе “East View” будзе цікавы ўсім, хто вывучае гісторыю аховы здароўя. Архіў даступны ў аддаленым рэжыме да 30 чэрвеня. Вывучэнню сумежных медыцынскіх дысцыплін, такіх як хімія, біялогія, псіхалогія, дапамогуць адпаведныя тэматычныя выпускі “Вестника Московского университета”.
Каб працаваць з поўнымі тэкстамі электронных выданняў дома, неабходна зарэгістравацца на электронных платформах. Зрабіць гэта вам дапамогуць невялікія інструкцыі:
- Як зарэгістравацца ў ЭБС “Znanium”
- Як зарэгістравацца ў ЭБС “БиблиоРоссика”
- Як зарэгістравацца ў БД “East View”
Інфармацыя аб ліцэнзійных электронных рэсурсах і магчымасцях выдаленай працы з імі, рэсурсах адкрытага доступу, а таксама рэсурсах, якія ствараюцца Нацыянальнай бібліятэкай, даступна ў раздзеле "Электронныя інфармацыйныя рэсурсы".
Зычым плённай вучобы і працы!
Матэрыял прадастаўлены аддзелам карпаратыўнага ўзаемадзеяння.
