Нацыянальная бібліятэка Беларусі стала адным з арганізатараў конкурсу буктрэйлераў – кароткіх відэаролікаў, прысвечаных пэўнай кнізе. Сярод задач конкурсу – стварэнне калекцыі такіх відэа для далейшай перадачы ў бібліятэчную сістэму рэспублікі. У спецыяльнай рубрыцы нашага партала можна пазнаёміцца з матэрыяламі, створанымі маладымі для маладых.Канстанцін Сіманаў сустрэў 1941 год ужо сфармаваным літаратарам, журналістам. Таму яго погляд на падзеі, у гушчы якіх ён апынуўся, асабліва каштоўны. Бо выяўленчая сіла літаратурнага таленту і пісьменніцкая назіральнасць дапамаглі яму разглядзець і захаваць на паперы шматлікія важныя дэталі жыцця на вайне.
Трылогія “Живые и мёртвые” напісана Канстанцінам Сіманавым на матэрыяле яго артыкулаў і нарысаў, а таксама – асабістага дзённіка, апублікаванага пад назвай “100 суток войны”. Гэты раман-эпапея апраўдана лічыцца адным з самых яркіх твораў пра вайну. Таму не дзіўна, што першая кніга трылогіі ўжо праз пяць гадоў пасля выхаду легла ў аснову сапраўды культавай аднайменнай экранізацыі 1964 года.
“Можно научиться воевать, но привыкнуть к войне невозможно”. Гэтая цытата адкрывае буктрэйлер, прысвечаны трылогіі Сіманава – і збольшага, думаецца, натхнёны экранізацыяй кнігі. У аўтараў роліка атрымалася адчуць пранізлівую ноту, якая гучыць і ў экранізацыі, і ў арыгінале. Чалавек і Вайна, Чалавек і Подзвіг, Чалавек і Смерць.
Жывыя і мёртвыя.
“...незаменимых нет. Верно, нет – всё так. Но ведь и заменимых тоже нет. Нет на свете ни одного заменимого человека”. І тым страшнейшая вайна, што адбірае жыцці, і тым больш велічны подзвіг у імя выратавання чалавецтва.Матэрыял падрыхтаваны аддзелам суправаджэння інтэрнэт-партала.