27 студзеня ў Нацыянальнай бібліятэцы адбыўся навукова-практычны семінар “Шляхамі маладнякоўцаў”, па выніках якога падрыхтаваны электронны зборнік.
Мерапрыемства прайшло ў рамках рэспубліканскага праекта “На хвалі часу, у плыні жыцця”, які рэалізуецца сумеснымі намаганнямі чатырох арганізацый-партнёраў: Нацыянальнай бібліятэкі Беларусі, Дзяржаўнага музея гісторыі беларускай літаратуры, Беларускага дзяржаўнага архіва-музея літаратуры і мастацтва і Выдавецкага дома “Звязда” (часопіса “Маладосць”). На семінары ўдзельнікі прадставілі свае даклады, якія ўвайшлі ў склад электроннага зборніка і цяпер даступны для азнаямлення.
Загадчыца інфармацыйна-аналітычнага аддзела Таццяна Лаўрык распавяла аб працы Нацыянальнай бібліятэкі над праектам на працягу двух гадоў, а для электроннага зборніка прадставіла даклад пра аповесць Змітрака Бядулі “Салавей”. Вядучы бібліёграф інфармацыйна-аналітычнага аддзела Святлана Вербаль выступіла з дакладам аб габрэйскай спадчыне ў творчасці маладнякоўцаў Змітрака Бядулі і Ізі Харыка. Цікавымі звесткамі аб сямейна-радаводным коле Змітрака Бядулі падзяліўся вядучы навуковы супрацоўнік Беларускага дзяржаўнага архіва-музея літаратуры і мастацтва Віктар Жыбуль.
Свае артыкулы прадставілі супрацоўнікі філіялаў Дзяржаўнага музея гісторыі беларускай літаратуры – загадчыца музея “Беларуская хатка” Таццяна Лабада і малодшы навуковы супрацоўнік Літаратурнага музея Петруся Броўкі Дарыя Карчашкіна.
Таксама ў зборнік увайшлі даклады кандыдата філалагічных навук Аксаны Данільчык, дацэнта кафедры рэдакцыйна-выдавецкіх тэхналогій Беларускага дзяржаўнага тэхналагічнага ўніверсітэта, кандыдата філалагічных навук Андрэя Акушэвіча. Супрацоўнікі Цэнтра даследаванняў беларускай культуры, мовы і літаратуры Нацыянальнай акадэміі навук Беларусі, кандыдаты філалагічных навук Анатоль Трафімчык і Ігар Шаладонаў у сваіх дакладах далі літаратуразнаўчую ацэнку творчасці Змітрака Бядулі.
Далучылася да семінара з дакладам даследчыца з Санкт-Пецярбурга, кандыдат філалагічных навук Марыя Бухаркіна, якая расказала пра дзейнасць свайго прадзеда, сябра “Маладняка” Віктара Бухаркіна.
Доктар філалагічных навук, прафесар Баранавіцкага дзяржаўнага ўніверсітэта Алена Белая, не маючы магчымасці прысутнічаць на мерапрыемстве, прадставіла для публікацыі артыкул “Адметнасць тыпу матроса ў рамане З. Бядулі «Язэп Крушынскі»”, які стаў цікавым і каштоўным папаўненнем зборніка.
Даклады Дарыі Карчашкінай і Аксаны Данільчык раней былі надрукаваны ў часопісе “Маладосць” (№№ 3 і 4, 2021 г.) у рубрыцы “На хвалі часу, у плыні жыцця”, рыхтуецца да друку артыкул Андрэя Акушэвіча.
Запрашаем на сайт навукова-практычнага семінара “Шляхамі маладнякоўцаў” для азнаямлення з электронным зборнікам яго матэрыялаў.
Матэрыял пададзены інфармацыйна-аналітычным аддзелам.
