З 1 красавіка па 31 мая ў зале прававой інфармацыі (2-гі паверх, пам. 207b) ладзіцца тэматычная кніжная выстаўка “Ахова праў інтэлектуальнай уласнасці”, прысвечаная Міжнароднаму дню інтэлектуальнай уласнасці
Гэты Дзень быў абвешчаны Генеральнай асамблеяй Сусветнай арганізацыі інтэлектуальнай уласнасці (САІУ) у верасні 2000 г. і штогод адзначаецца 26 красавіка – у дзень уступлення ў сілу Канвенцыі, паводле якой заснавана арганізацыя.
САІУ з’яўляецца найстарэйшай міжнароднай арганізацыяй у галіне аховы інтэлектуальнай уласнасці. Яе дзейнасць прысвечана развіццю збалансаванай і даступнай міжнароднай сістэмы інтэлектуальнай уласнасці (ІУ), якая забяспечвае ўзнагароду за творчую дзейнасць, стымулюе інавацыі і ўносіць уклад у развіццё грамадства. На дадзены момант членамі САІУ з’яўляюцца 184 дзяржавы, або больш за 90 % краін свету.
Інтэлектуальная ўласнасць у шырокім разуменні азначае замацаваныя законам выключныя правы на вынік інтэлектуальнай дзейнасці або сродкі індывідуалізацыі.
Вынаходніцкая і іншая творчая дзейнасць чалавека, рэгулюемая сістэмай аховы інтэлектуальнай уласнасці, з’яўляецца ключавым фактарам стварэння матэрыяльных выгод і павышэння ўзроўню жыцця. Вынаходніцтвы, карысныя мадэлі, прамысловыя ўзоры, таварныя знакі, аўтарскае права і сумежныя правы як вынікі творчасці і ведаў з’яўляюцца магутнымі інструментамі садзейнічання эканамічнаму і культурнаму развіццю грамадства.
Штогод Міжнародны дзень інтэлектуальнай уласнасці прысвячаецца якой-небудзь тэме. Тэма Дня ў гэтым годзе: “Плануючы будучыню”. Яго мэта – дабіцца лепшага разумення шырокімі слаямі насельніцтва таго, што ўяўляе сабой ІУ, і паказаць, якім чынам сістэма абароны ІУ спрыяе не толькі развіццю музыкі, мастацтва і індустрыі забаў, але і стварэнню тавараў і інавацыйных тэхналогій, якія вызначаюць аблічча навакольнага свету.
Гэты Дзень шырока адзначаецца і ў Рэспубліцы Беларусь, дзе функцыянуе эфектыўная сістэма аховы інтэлектуальнай уласнасці, якая ўключае спецыяльнае заканадаўства і неабходную арганізацыйную інфраструктуру. Заканадаўства Рэспублікі Беларусь у сферы інтэлектуальнай уласнасці ўключае міжнародныя дагаворы, спецыяльныя законы, а таксама падзаконныя нарматыўныя прававыя акты. Рэспубліка Беларусь з’яўляецца ўдзельніцай 17 шматбаковых міжнародных дагавораў, якія функцыянуюць пад эгідай Сусветнай арганізацыі інтэлектуальнай уласнасці, а таксама шэрагу шматбаковых міжнародных дагавораў, заключаных у рамках СНД, у галіне аховы прамысловай уласнасці, аўтарскага права і сумежных праў.
З лістапада 2010 г. Нацыянальная бібліятэка Беларусі стала бібліятэкай – дэпазітарыем дакументаў САІУ. Прапанаваная тэматычная выстаўка пазнаёміць чытачоў бібліятэкі з дзейнасцю гэтай арганізацыі і з яе дакументамі, сярод якіх матэрыялы па міжнародным заканадаўстве ў сферы інтэлектуальнай уласнасці (канвенцыі, дагаворы, пагадненні), літаратура па аўтарскім праве, патэнтах і таварных знаках, штогадовыя справаздачы і кароткія агляды САІУ.
Экспазіцыя ўключае наступныя тэматычныя раздзелы:
- Інтэлектуальная ўласнасць: роля і месца ў развіцці сучаснага грамадства;
- Міжнародныя законы і нормы ў галіне інтэлектуальнай уласнасці. Дзейнасць САІУ;
- Прамысловая ўласнасць і патэнтавае права;
- Аўтарскае права і сумежныя правы;
- Ахова інтэлектуальнай уласнасці ў Рэспубліцы Беларусь.
На выстаўцы прадстаўлена больш за 60 дакументаў на рускай і англійскай мовах: кнігі, брашуры, перыядычныя выданні.
Выстаўка будзе цікавая студэнтам, аспірантам, выкладчыкам юрыдычных і эканамічных факультэтаў, кіраўнікам прадпрыемстваў, супрацоўнікам навукова-даследчых і прыкладных інстытутаў, юрысконсультам і ўсім, хто цікавіцца праблемамі інтэлектуальнай уласнасці.
Карысныя спасылкі
- Сусветная арганізацыя інтэлектуальнай уласнасці (САІУ)
- Міжнародны дзень інтэлектуальнай уласнасці 2011
- Міжнародны дзень інтэлектуальнай уласнасці – архіў
- Вынаходніцтвы (патэнты)
- Таварныя знакі
- Прамысловыя ўзоры
- Геаграфічныя ўказанні
- Аўтарскае права
- Сумежныя правы
- Калектыўнае кіраванне аўтарскім правам
- Дагаворы па ахове інтэлектуальнай уласнасці
- Дагаворы аб глабальнай сістэме аховы
- Дагаворы аб класіфікацыях
- Канвенцыя, паводле якой заснавана Сусветная арганізацыя інтэлектуальнай уласнасці