З 16 красавіка па 31 мая 2008 года ў зале беларускай літаратуры (пам. 205) праходзіць тэматычная кніжная выстаўка «Беларуская мастацкая літаратура».
Выстаўка налічвае звыш 500 выданняў. Экспазіцыю складаюць новыя тэксты і перавыданні беларускамоўных і рускамоўных твораў класічнай і сучаснай беларускай мастацкай літаратуры розных жанраў, якія былі выдадзены беларускімі выдавецтвамі ў апошнія гады. Значнае месца ў экспазіцыі займаюць творы беларускіх класікаў: Я. Коласа, Я. Купалы, З. Бядулі, Ф. Аляхновіча, М. Гарэцкага, М. Багдановіча, І. Шамякіна, В. Быкава, С. Грахоўскага і інш. Сучасныя аўтары прадстаўлены такімі імёнамі, як А. Дудараў, Э. Скобелеў, У. Карызна, Р. Баравікова, У. Гніламёдаў, В. Шніп, Л. Рублеўская, А. Камоцкі, А. Федарэнка, Л. Сільнова, В. Кустава і інш.
Асноўная колькасць экспанаваных выданняў прадстаўлена выдавецтвамі «Мастацкая літаратура», «Кнігазбор», «Саюз беларускіх пісьменнікаў», «Беларуская навука», «Чатыры чвэрці», «Выдавец Віктар Хурсік», «І.П. Логвінаў» і інш.
У асобны раздзел сабраныя серыйныя выданні беларускай мастацкай літаратуры. Добрая якасць, высокі густ і арыгінальнасць мастацкага афармлення гэтых выданняў прыцягваюць асаблівую ўвагу наведвальнікаў. Прытым аднасерыйныя выданні вытрыманы ў адзіным стылі. Шырока прадстаўлены серыі «Дэбют», «Залатое пяро», «Беларускі кнігазбор: БК. Сер.1. Мастацкая літаратура», «Беларусь літаратурная», «Беларуская проза ХХ стагоддзя», «Беларуская проза ХХI стагоддзя», «Беларуская паэзія ХХ стагоддзя», «Беларуская паэзія ХХI стагоддзя», «Кнігарня "Наша Ніва"», «Гісторыя ў асобах», «Вера. Надзея. Любоў», «Сучасны беларускі дэтэктыў», «Беларуская фантастыка» і інш.
Раздзел выстаўкі «Дзіцячая беларуская мастацкая літаратура» ўключае літаратуру, якую вывучаюць дзеці па школьнай праграме і пазашкольным чытанні. У экспазіцыі прадстаўлены кнігі для сярэдняга і старэйшага школьнага ўзросту серыі «Бібліятэка школьніка». Для дашкольнікаў і школьнікаў малодшага ўзросту экспануюцца казкі, апавяданні, аповесці, вершы, паэмы, лічылкі, загадкі. Некаторыя з іх выдадзены ў серыях «Казка за казкай», «Беларуская аўтарская казка», «Казачны свет» і інш. Шэраг кніг выдадзены з надпісам «Году дзіцяці прысвячаецца».Выстаўка будзе цікавая шырокаму колу чытачоў.
Кантактны тэлефон: 293 27 16
 |
 |
 |
 |
 |
 |
