З 1 студзеня па 28 лютага ў зале нотных і аўдыявізуальных дакументаў (пам. 305) праходзіць юбілейная выстава “Думкі і настроі Уладзіміра Солтана”, прымеркаваная да 70-годдзя з дня нараджэння беларускага кампазітара, лаўрэата Дзяржаўнай прэміі Беларусі.
Сёлета Уладзіміру Яўгенавічу Солтану магло б споўніцца 70 гадоў. Ён пражыў нядоўгае, але яркае і насычанае жыццё. Свой творчы шлях кампазітар пачаў досыць рана, яшчэ ў гады навучання ў Брэсцкім музычным вучылішчы (1970–1974). Першыя пробы пяра былі звязаны з вакальнымі жанрамі, але ўжо ў кансерваторскія гады У. Солтан звярнуўся да аркестравай і камерна-інструментальнай музыкі. Менавіта ў гэтых жанрах цалкам раскрыўся яго творчы патэнцыял.
Адметнай рысай твораў У. Солтана з’яўляецца яго імкненне насыціць музыку драматызмам. Гэтая асаблівасць кампазітарскага мыслення найбольш ярка выявілася ў оперы “Дзікае паляванне караля Стаха” (паводле аповесці У. Караткевіча), якая стала візітнай карткай кампазітара і назаўжды ўвайшла ў гісторыю опернага мастацтва нашай краіны. Не выпадкова з імем Уладзіміра Солтана звязваюць і пачатак адраджэння нацыянальнай оперы: ён злучае традыцыі еўрапейскай музыкі з беларускай песеннасцю і гучаннем народных інструментаў у сімфанічным аркестры.
Кампазітар стаў аўтарам яшчэ дзвюх опер на лібрэта С. Клімовіча: “Пані Ядвіга” і “Мілавіца”. Аднак у сувязі з трагічнай гібеллю Уладзіміра Яўгенавіча оперы не былі пастаўленыя.
Выстава знаёміць чытачоў з музычнай спадчынай кампазітара. На ёй прадстаўлены нотныя зборнікі, гуказапісы, навуковыя артыкулы і публікацыі з перыядычных выданняў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.
