З 4 красавіка па 2 мая 2008 года ў зале нотных і аўдыёдакументаў (пам. 305) праводзіцца тэматычная выстаўка «Джазавыя сілуэты: майстры сусветнага джаза».
Джаз – разнавіднасць прафесійнай музыкі XX стагоддзя, феномен гістарычны, эстэтычны, сацыяльны. Гэтае жывое сучаснае мастацтва, якое падчас развіцця склалася ў складаную сістэму з рознымі напрамкамі, плынямі, стылямі, з комплексам арыгінальных выразных сродкаў. Без уплыву самога джаза было бы папросту немагчыма з’яўленне цэлага шэрага відаў і жанраў сучаснай эстрады, рок-музыкі з яе рознымі стылямі і напрамкамі. Менавіта ад джаза ідуць шматлікія прыёмы – інструментальная і вакальная тэхніка, манера гуказдабывання, спосабы інтаніравання, аркестравыя сродкі, што сустракаюцца ў розных актуальных у мастацкіх адносінах жанрах музыкі нашых дзён.
Джаз нельга параўнаць ні з адным класічным музычным жанрам, чыё развіццё здзяйснялася стагоддзямі. Гэта не толькі асобны, спецыфічны род музыкі, але і асаблівае непаўторнае асяроддзе, неад’емную частку якога складаюць творчыя людзі, якія ствараюць музыку.
У стогадовай гісторыі джаза былі тысячы імёнаў, якія атрымалі прызнанне пры жыцці або пасмяротна і здабылі ўсенародную любоў, людзей розных нацыянальнасцей і рэлігійных канфесій, мужчын і жанчын. Гэтая шырокая панарама асоб джазавага свету не можа не ўражваць.
На выстаўцы ёсць больш за 120 дакументаў, сярод якіх грампласцінкі, кампакт-дыскі, нотныя выданні, а таксама кнігі, часопісы і публікацыі, прысвечаныя гісторыі развіцця сусветнага джазавага мастацтва і яго яркім прадстаўнікам.
Выстаўка разлічана на шырокае кола чытачоў.
Кантактны тэлефон 293-27-52.
 |
 |
 |
 |
 |
 |
