З 12 кастрычніка па 30 лістапада ў зале нотных і аўдыядакументаў (пам. 305) праходзіць выстаўка "Класік венгерскай музыкі", прысвечаная 200-годдзю з дня нараджэння венгерскага кампазітара, піяніста і дырыжора Ф. Ліста.
Феранц Ліст (1811–1886) – вялікі піяніст і кампазітар XIX ст., адзін з найбуйнейшых прадстаўнікоў музычнага рамантызму. І сёння яго віртуозная тэхніка з’яўляецца ўзорам для сучасных піяністаў, а творы – вяршынямі фартэпіяннай музыкі. Кампазітар-піяніст здзейсніў карэнны пераварот у піяністычнай тэхніцы: увёў "сімфанічную трактоўку" фартэпіяна, заснаваную на паўнагучнасці і маляўнічасці.
Як кампазітар ён зрабіў масу адкрыццяў у галіне гармоніі, мелодыкі, формы, стварыў новыя інструментальныя жанры – рапсодыю і сімфанічную паэму.
Творчая дзейнасць Ф. Ліста была на рэдкасць шматграннай. Смелы наватар, ён узбагаціў музыку новымі ідэямі і выразнымі сродкамі.
Кампазітар-рамантык імкнуўся раскрыць у сваіх творах унутраную сувязь музыкі з паэзіяй.
Творчая спадчына Ф. Ліста шырокая і разнастайная: сімфанічныя паэмы "Бітва гунаў", "Гамлет", "Венгрыя", "Праметэй", два канцэрты для фартэпіяна з аркестрам, шматлікія рамансы і хоры, фартэпіянныя творы (санаты, эцюды, рапсодыі, вальсы), сачыненні для аркестра і аргана, транскрыпцыі сачыненняў розных кампазітараў, а таксама арыгінальныя творы духоўнага характару.
На выставачных стэндах прадстаўлены нотныя выданні, аўдыядакументы твораў кампазітара, а таксама кнігі і артыкулы пра яго творчасць.
Кантактны тэлефон: 293-27-52.
 |
 |
 |
 |
 |
 |
 |
 |
 |
 |
 |
 |
