З 21 мая па 10 чэрвеня 2008 года ў зале беларускай літаратуры (пам. 205) праходзіць выстаўка "Мелодыя душы", прысвечаная 70-годдзю Уладзіміра Іванавіча Карызны, беларускага паэта, лаўрэата Дзяржаўнай прэміі Беларусі, аўтара Дзяржаўнага гімна Республікі Беларусь.
Імя Уладзіміра Карызны – адно з самых вядомых у нацыянальнай культуры. На творчым рахунку паэта больш за 20 паэтычных зборнікаў, адметную частку якіх складаюць песні – каля двухсот твораў.
Паэзія У. Карызны прасякнута высокім грамадзянскім пачуццём, надзвычай тонкім лірызмам, душэўнай цеплынёй. Тэматыка твораў паэта разнастайная: памяць мінулай вайны, балючы ўспамін аб ваенным маленстве, любоў да роднага краю, жыццё і праца, шчасце, радасць і паўсядзённы клопат сучасніка, прыгажосць чалавечых адносін. У многіх творах Карызна звяртаецца да фальклорнай паэтыкі.
На выстаўцы прадстаўлены зборнікі "Край мой сінявокі" (1963), "Жураўліны досвітак" (1969), "Святло ліўня" (1972), "Цеплыня" (1977), "Шумяць вербы" (1982), "Музыка ў свеце" (1985), "Расколіна на Звоне Свабоды" (1986), "Душы разгуканай мелодыя" (1988), "Азёры дабрыні" (1995), "Хвіліна святла" (2000), "Доля Русь наша белая" (2007) і іншыя.
У. Карызна - цудоўны дзіцячы паэт. Тонкі знаўца псіхалогіі, умелы выхавальнік і педагог, ён умее размаўляць з дзецьмі шчыра і даверліва, без фальшу і залішняй надакучлівасці. Творы для дзяцей прадстаўлены рознымі жанрамі: вершамі, казкамі, небыліцамі, лічылкамі, загадкамі. У экспазіцыі – кнігі "На сяле ў бабулі" (1975), "Кыонг і яго сябры" (1982), "Малююць дзеці" (1984), "Зямля – два паўшар’і" (1988), "Мір і сонейка – для ўсіх" (1990), "Насціна кніжка"(1995), "Іграй, жалейка, не змаўкай..." (1998), "Чароўнае вочка" (2003).
Рэдкая музычнасць, шчырасць пачуцця, дакладнасць думкі твораў Карызны не адно дзесяцігоддзе прывабліваюць кампазітараў. Да паэзіі У. Карызны звярталіся і звяртаюцца кампазітары ўсіх пакаленняў: А. Багатыроў, Ю. Семяняка, І. Лучанок, Я. Глебаў, Л. Захлеўны, Д. Смольскі, Э. Ханок, Э. Зарыцкі, У. Буднік, І. Іваноў і іншыя. Шэраг песень на вершы Карызны ўвайшлі ў залаты фонд нацыянальнага рэпертуару. На выставачных паліцах прадстаўлены зборнікі песень "Клубныя вечары" (1979), "Люблю цябе, Белая Русь" (1984), "Салавей спявае" (1990), "Гэта наша Радзіма" (1998).
Экспазіцыя знаёміць з перакладамі У. Карызны на беларускую мову асобных твораў з літоўскай, в’етнамскай, украінскай і грузінскай моў, а таксама з выданнямі, у якіх Уладзімір Іванавіч выступае як рэдактар, рэцэнзент і ўкладальнік.
Кантактны тэлефон: 293-27-16 |
 |
