З 2 па 31 кастрычніка ў зале беларускай літаратуры (пам. 205) праходзіць выстаўка “На мове любові, пяшчот, калыханак”, прымеркаваная да 100-годдзя з дня нараджэння беларускай паэтэсы і перакладчыцы Эдзі Агняцвет (1913–2000).
Канкрэтнасць і глыбіня думкі, мастацкая дасканаласць, лірызм, вобразнасць, багацце выяўленчых сродкаў, уменне сказаць проста і даходліва пра самае сур’ёзнае, надаць твору дынамічны, інтрыгуючы сюжэт – гэта тыя асноўныя рысы таленту Эдзі Агняцвет (сапр. Каган Эдзі Сямёнаўны), якія яна набыла за многія гады літаратурнай працы. Яна аднолькава яскрава і плённа праявіла сябе ў паэзіі як для дарослых, так і для дзяцей. У 1986 г. за кнігу вершаў і перакладаў для дзяцей “На двары алімпіяда” (1984) паэтэса была ўзнагароджана Міжнародным ганаровым дыпломам імя Г.Х. Андэрсена. Яе імя разам з іншымі занесена ў Кнігу Гонару.
Экспазіцыя пазнаёміць наведвальнікаў з выбранымі творамі Э. Агняцвет, зборнікамі паэзіі “Маё пакаленне” (1935), “Край мой родны” (1945), “Спадзяванне калыханак” (1983), “Закаханым” (1986), “І смутак, і святло” (1996), паэмай “На беразе Волгі” (1940), кнігамі паэзіі для дзяцей “Доктар Смех” (1977), “Хто пачынае дзень?” (1982), “Буду настаўнікам” (1990), “Хай часцей смяюцца дзеці” (1997), “Пад сінім небасхілам” (1999), кнігай для чытання ў 4-м класе “Роднае слова” (у суаўт. з Я. Івашуціч, 1995) і інш.
Эдзі Агняцвет адкрыла беларускаму чытачу многія цікавыя старонкі паэзіі іншых народаў – французскай, украінскай, узбекскай, літоўскай... На выстаўцы можна ўбачыць зборнік перакладаў “З французскай і бельгійскай паэзіі” (1993), кнігі П.Ж. Беранжэ “Выбраныя песні” (1960), А. Экзюперы “Маленькі прынц” (1969), Г. Апалінэра “Зямны акіян” (1973), П. Элюара “З табою” (1980), Зульфіі “Такое сэрца ў мяне” (у суаўт. з А. Грачанікавым, 1985), зборнікі паэзіі для дзяцей Я. Османіса “Сабака з рагаткай” (1976), Г. Сулейманавай “Сорак косак” (1982), М. Джаліля “Я гляджу на зоры”(1985) і інш. Пазнаёміцца можна і з творамі паэтэсы, перакладзенымі на іншыя мовы свету.
Асобным раздзелам прадстаўлены зборнікі песень на словы Э. Агняцвет. Кампазітары М. Аладаў, У. Алоўнікаў, А. Багатыроў, Г. Вагнер, Я. Глебаў, Э. Зарыцкі, І. Лучанок і іншыя далі новае жыццё многім вершаваным творам паэтэсы.
Завяршаюць экспазіцыю матэрыялы пра жыццё і творчасць Эдзі Агняцвет.
Кантактны тэлефон: (8 017) 293 27 16.
 |
 |
 |
 |
 |
 |
