З 4 верасня па 29 верасня ў зале дакументаў міжнародных арганізацый (пам. 207g) дэманструецца выстаўка “Наш свет. Твой крок. Дапамажы блізкаму!”, прысвечаная Міжнароднаму дню дабрачыннасці.

Гэты Дзень быў абвешчаны на 67-й сесіі Генеральнай Асамблеі ААН 17 снежня 2012 года (рэзалюцыя 67/105) і штогод адзначаецца 5 верасня.

Устанавіўшы гэта свята, Генеральная Асамблея прапанавала ўсім арганізацыям сістэмы ААН, міжнародным, рэгіянальным і няўрадавым арганізацыям усяляк заахвочваць і развіваць дабрачыннасць і заклікала ўсіх людзей, незалежна ад узросту і полу, даць выхад жаданню да бескарыслівага дзеяння, якое жыве ў душы кожнага чалавека.

Дата 5 верасня была абрана невыпадкова. Гэта дзень скону маці Тэрэзы, узнагароджанай у 1979 годзе Нобелеўскай прэміяй міру “за дзейнасць па барацьбе супраць беднасці і за дапамогу людзям”. Маці Тэрэза (народжаная Агнес Гонджа Баяджыу), вядомая місіянерка і манашка, на працягу больш як 45 гадоў служыла бедным, хворым і сіротам, займаючыся дабрачыннай дзейнасцю спачатку ў Індыі, а затым і ў іншых краінах. Сваім жыццём і добрымі справамі дзеля самых бедных і безабаронных прадстаўнікоў чалавецтва яна натхніла на добрыя ўчынкі многіх людзей ва ўсім свеце і атрымала ўсеагульнае прызнанне.

Дабрачыннасць – гэта дзейнасць, пад час якой рэсурсы добраахвотна і бязвыплатна размяркоўваюцца іх уладальнікамі для садзейнічання людзям, якія жывуць у нястачы, рашэння грамадскіх праблем, удасканалення ўмоў грамадскага жыцця. Пры гэтым у якасці рэсурсаў могуць выступаць як фінансавыя і матэрыяльныя сродкі, так і здольнасці і энергія людзей.

Дабрачыннасць іграе важную ролю ў сцвярджэнні ідэалаў Арганізацыі Аб’яднаных Нацый і забеспячэнні яе функцыянавання. Ахвяраванне асабістага часу або грошай, добраахвотная праца па месцы жыхарства або на іншым краі свету, бескарыслівае праяўленне клопату і дабрыні – гэтыя і іншыя выражэнні салідарнасці людзей свету дапамагаюць у агульным імкненні да гарманічнага суіснавання і мірнай будучыні.

Дабрачыннасць, як і добраахвотніцтва і філантропія, гуртуе людзей і садзейнічае стварэнню інклюзіўнага і больш устойлівага грамадства. Яна спрыяе падтрымцы дыялогу паміж людзьмі, прыналежнымі да розных цывілізацый, культур і рэлігій. Яна дапамагае пераадолець наступствы цяжкіх гуманітарных крызісаў, дапаўняе дзейнасць дзяржавы ў сферы аховы здароўя, адукацыі, жыллёвага будаўніцтва і абароны насельніцтва. Такая дзейнасць спрыяе развіццю культуры, навукі, спорту і забяспечвае ахову прыроды. Яна таксама садзейнічае абароне прадстаўнікоў найбольш слабых і бяздольных пластоў насельніцтва. Дабрачынная дзейнасць прымушае голас розуму і літасці мацней гучаць ва ўмовах канфліктаў.

Міжнародны дзень дабрачыннасці закліканы звярнуць увагу грамадскасці на ролю розных дабрачынных арганізацый і асобных людзей у пераадоленні галечы і вострых гуманітарных крызісаў, заахвоціць узаемадзеянне дабрачынных фондаў розных краін.

Прапанаваная чытачам выстаўка змяшчае каля 60 дакументаў. Гэта кнігі, перыядычныя выданні, дакументы міжнародных арганізацый, брашуры і буклеты на рускай і англійскай мовах.

Экспазіцыя ўключае наступныя тэматычныя раздзелы:

Гісторыя развіцця дабрачыннасці ў свеце.
Сучасныя тэндэнцыі дабрачыннасці: праблемы і перспектывы.
Дабрачыннасць у Беларусі.
Дзяржаўная палітыка, бізнес і дабрачыннасць.
Дзейнасць міжнародных і рэгіянальных дабрачынных фондаў і арганізацый.
Рэлігійныя абшчыны свету і дабрачынная дзейнасць.

Выстаўка будзе карыснай навуковым супрацоўнікам, выкладчыкам, студэнтам ВНУ, кіраўнікам і спецыялістам органаў дзяржаўнага кіравання, сацыяльным работнікам і шырокаму кругу чытачоў, якія цікавяцца пытаннямі дабрачыннасці.

Карысныя спасылкі

Наш свет. Твой крок. Дапамажы блізкаму!

Інфармацыйныя рэсурсы

Паслугі