З 16 кастрычніка па 30 лістапада ў Нацыянальнай бібліятэцы Беларусі (3-ці паверх, кальцавы калідор) праходзіць тэматычная кніжная выстаўка “Найвялікшыя скарбы чалавецтва”.
Шмат дзіўнага і нязведанага захоўвае наша планета. Незгасальна жаданне чалавека больш даведацца пра невядомыя землі, краіны і гарады. У кожным з нас жыве вандроўнік-першаадкрывальнік.
Экспазіцыя выстаўкі дазваляе атрымаць новыя ўражанні і прыемныя эмоцыі, пазнаёміцца з жыццём людзей у іншых краінах і паглядзець найпрыгажэйшыя мясціны свету. Яна змяшчае інфармацыю пра ўсе кантыненты і краіны, якія іх складаюць, прыроднае, культурнае і гістарычнае багацце розных народаў. Назвы такіх кніжных серый, як “Величайшие сокровища человечества на пяти континентах”, “Памятники всемирного наследия”, “Путеводитель, проверенный временем”, “Весь мир в кармане”, “Биографии чудес света” і многіх іншых, гавораць самі за сябе.
У розных краінах свету захаваліся рэдкія па прыгажосці аазісы: нацыянальныя паркі, запаведнікі і рэзерваты, гістарычныя помнікі, кафедральныя саборы, палацы мінулага і пампезныя сучасныя будынкі, вулачкі і плошчы, дзе прызначаюць спатканні, месцы, з якіх адкрываюцца цудоўныя краявіды…
З дапамогай кніг, прадстаўленых на выстаўцы, (усяго каля 300 выданняў) можна атрымаць найбольш поўнае ўяўленне пра самыя цікавыя, экзатычныя і незвычайныя мясціны Зямлі, здзейсніць віртуальнае падарожжа ў любы куток планеты.
Кантактны тэлефон: 293-28-86.
 |
 |
 |
 |
 |
 |
 |
 |
 |
 |
 |
 |
