З 1 снежня 2008 года па 4 студзеня 2009 года ў зале дакументаў міжнародных арганізацый (2 паверх, пакой 207g) праходзіць тэматычныя кніжная выстаўка “СНІД: урокі мінулага, магчымасці на будучыню”, прысвечаная Сусветнаму дню барацьбы са СНІДам.

Гэты дзень упершыню адзначаўся 1-га снежня 1988 года пасля таго, як на сустрэчы міністраў аховы здароўя ўсіх краін прагучаў заклік да сацыяльнай цярпімасці і пашырэння абмену інфармацыяй па ВІЧ/СНІДу. У 2008 годзе Сусветны дзень барацьбы са СНІДам будзе адзначацца ўжо ў дваццаты раз. Галоўныя мэты гэтага дня – прыцягненне ўвагі грамадскасці да праблемы распаўсюджвання такога смяротна небяспечнага захворвання як СНІД, а таксама яго прафілактыка.

На сучасным этапе СНІД набыў маштабы пандэміі – гэта бедства сусветнага маштабу, якое датычыцца людзей у кожнай краіне без выключэнняў. Разумеючы ўсё большыя цяжкасці, звязаныя з пандэміяй ВІЧ/СНІДу, ААН стварыла ў 1996 годзе Аб’яднаную праграму Арганізацыі Аб’яднаных Нацый па праблемах ВІЧ/СНІДу (ЮНЭЙДС). ЮНЭЙДС падтрымлівае доўгатэрміновыя глабальныя праекты па прафілактыцы ВІЧ-інфекцыі і СНІДу, дапамагае змагацца за правы чалавека незалежна ад ВІЧ-статусу, ажыццяўляе дапамогу краінам ва ўсім свеце, падтрымліваючы нацыянальныя даследаванні па пытаннях ВІЧ/СНІДу.

Барацьба з ВІЧ-інфекцыяй і СНІДам актыўна вядзецца ў нас у рэспубліцы. Гэта праблема прызнаная адной з прыярытэтных для аховы здароўя, эканамічнага і сацыяльнага развіцця краіны. Прынята Дзяржаўная праграма прафілактыкі ВІЧ-інфекцыі на 2006 – 2010 гг. і Стратэгічны план мерапрыемстваў па процідзеянні ВІЧ-інфекцыі ў Рэспубліцы Беларусь на 2004 – 2008 гг., дасягнуты вялікія поспехі ў прафілактыцы і лячэнні ВІЧ-інфекцыі.

На выстаўцы прадстаўлены больш за 60 дакументаў міжнародных арганізацый (ААН, ЮНЕСКА, Еўрапейскага Саюза, Савета Еўропы і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН (мастхед), брашуры, буклеты. Экспазіцыя складаецца з наступных раздзелаў:

Эпідэмія СНІДу: глабальны агляд;
Што такое СНІД, яго ўздзеянне на людзей і грамадства, лячэнне і дагляд за хворымі;
Прафілактыка ВІЧ/СНІДу;
Міжнароднае супрацоўніцтва ў мэтах супрацьдзеяння ВІЧ/СНІДу. Дзейнасць ЮНЕЙДС;
СНІД і правы чалавека;
Нацыянальныя меры процідзеяння СНІДу, дзяржаўная палітыка барацьбы з ВІЧ/СНІДам у Рэспубліцы Беларусь;

Выстаўка адрасуецца сацыяльным і медыцынскім работнікам, супрацоўнікам праваахоўных органаў, выкладчыкам і студэнтам, педагогам і бацькам, а таксама ўсім, хто цікавіцца праблемамі, звязанымі з ВІЧ/СНІДам.

Спасылкі на Інтэрнет-рэсурсы

Арганізацыя Аб’яднаных Нацый