З 7 па 30 сакавіка ў зале беларускай літаратуры (пам. 205) праходзіць выстаўка “Святло сакавіцкага слова”, прысвечаная 75-годдзю з дня нараджэння беларускага мовазнаўца Г.М. Малажай (1938–2005).
Доктар філалагічных навук, член-карэспандэнт Акадэміі адукацыі Беларусі, таленавіты навуковец, Галіна Мікалаеўна ўсё жыццё была ўдзячна свайму настаўніку – Фёдару Міхайлавічу Янкоўскаму. Менавіта ён дапамог будучай даследчыцы роднай мовы раскрыць яе вялікі талент. Добрае і душэўнае слова настаўніка, яго парады далі крылы Галіне Мікалаеўне, і яна з вялікім натхненнем працавала на ніве роднай беларускай мовы і настаўніцтва.
Галіна Малажай падрыхтавала працу “Перыфраза ў сучаснай беларускай мове (структурна-семантычная і стылістычная характарыстыка)”, а пазней з’явіўся слоўнік “Беларуская перыфраза”. І гэта была сапраўдная рэвалюцыя ў беларускім мовазнаўстве.
Выстаўка складаецца з трох раздзелаў: “Каб жыло наша слова”, “Вернасць слову і справе”, “Несла святло роднага слова”, у якіх распавядаецца пра жыццё і творчасць таленавітай даследчыцы.
Сярод прадстаўленых на выстаўцы кніг – “Беларуская перыфраза” (1974), “Сучасная беларуская мова: перыфраза” (1980), “Лінгвістычны аналіз тэксту: заданні, тэксты, парады” (1982, 1992), “Беларуская мова” (1996, у суаўт.), “Пазакласная праца па беларускай мове” (1990, у суаўт.), “Практыкум па беларускай мове” (1993, у суаўт.)“ Сучасная беларуская мова. Слова. Перыфраза. Фразеалагізм” (1992), “Цэнтралізаванае тэсціраванне. Беларуская мова” (2004, 2005), “Школьны тлумачальны слоўнік беларускай мовы” (2013, у суаўт.) і інш.
Нават пасля яе смерці працягваюць выходзіць падрыхтаваныя Галінай Мікалаеўнай выданні. Былыя супрацоўнікі і вучні сёння выдаюць навуковую спадчыну сваёй любімай настаўніцы і калегі.
Іх намаганнямі было падрыхтавана два навуковыя выданні, прысвечаныя юбілейным датам – 60- і 70-годдзю з дня нараджэння прафесара Галіны Мікалаеўны Малажай. У 1998 г. выйшаў навуковы зборнік “Святло сакавіцкага слова”, а ў 2008 г. была праведзена рэспубліканская навуковая канферэнцыя, матэрыялы якой склалі зборнік “Актуальныя праблемы мовазнаўства і лінгвадыдактыкі”. Наведвальнікі выстаўкі маюць магчымасць пазнаёміцца з гэтымі дакументамі, а таксама з шэрагам прац, якія напісаны даследчыцай ў суаўтарстве.
Кантактны тэлефон: (8 017) 293 27 16.