З 15 ліпеня па 2 верасня ў Нацыянальнай бібліятэцы Беларусі (3-ці паверх, кальцавы калідор) праходзіць выстаўка, прысвечаная 1000-годдзю спачыну святога роўнаапостальнага князя Уладзіміра.
15 ліпеня па старым стылі (28 ліпеня па новым) – Дзень памяці святога роўнаапостальнага вялікага князя Уладзіміра. На стагоддзі наперад вызначыў ён духоўныя лёсы рускай культуры і веры, заклаў краевугольны камень у падмурак тысячагадовай гісторыі рускага праваслаўнага народа і рускай дзяржавы. Нямногія імёны на скрыжалях гісторыі могуць параўнацца па значэнні з імем князя Уладзіміра, хрысціцеля Русі.
Летапісны аповед пра “выбар веры” Уладзімірам носіць легендарны характар. Да двара выклікаліся прапаведнікі ісламу, іўдаізму, каталіцызму, але Уладзімір пасля гутаркі з “грэчаскім філосафам” спыніўся на праваслаўі. Гісторыкі завуць Уладзіміра Вялікім, царква – святым роўнаапостальным, народ даў імя яму Уладзімір Краснае Сонейка.
На кніжна-ілюстрацыйнай выстаўцы прадстаўлена каля 100 выданняў навуковага, публіцыстычнага і мастацкага зместу, якія пазнаёмяць чытачоў з гісторыяй хрысціянства, гісторыяй хрышчэння Русі, раскрыюць асобу легендарнага чалавека.
Пра жыццё князя Уладзіміра расказваюць кнігі Н. Мілюценкі “Святой равноапостольный князь Владимир и крещение Руси”, С. Склярэнкі “Владимир”, С. Аляксеева “Великие князья русские” і інш.
Асаблівую цікавасць выклікае кніга А. Карпава “Владимир Святой”, выдадзеная ў серыі “Жизнь замечательных людей”. Якім быў князь Уладзімір у жыцці? Як адбылося ператварэнне язычніка ў асветніка Айчыны, вялікага дзяржаўнага мужа, чалавека найвышэйшага духоўнага подзвігу? Гэтая кніга з’яўляецца першай спробай узнавіць сапраўдную біяграфію князя на аснове скрупулёзнага вывучэння захаваных крыніц.
Каштоўнымі экспанатамі выстаўкі з’яўляюцца таксама дакументы, выдадзеныя яшчэ ў канцы XIX – пачатку XX стагоддзя. Сярод іх кнігі святароў Я. Уладзімірскага “Святой равноапостольный князь Владимир: к 900-летию со дня кончины 1015–1915 гг.” (Вільня, 1915) і В. Някрасава “К девятисотлетию крещения Руси: 988–1888 гг.” (Вільня, 1888).
Гісторыя хрышчэння Русі шырока прадстаўлена ў кнігах А. Бычкова “Киевская Русь. Новый взгляд на историю государства”, А. Кузьміна “Крещение Киевской Руси”, У. Шамбарава “История княжеской Руси. От Киева до Москвы”, І. Табава “Когда крестилась Русь”, К. Бястужава-Руміна “Крещение Руси” і многіх інш. Таксама на выстаўцы дэманструюцца выданні такіх серый, як “Библиотека открытий”, “Величайшие династии”, “Киевская Русь”, “История России” і інш.
Кантактны тэлефон: (8 017) 293 28 86.
 |
 |
 |
 |
 |
