З 7 мая па 8 чэрвеня ў аддзеле абслугоўвання афіцыйнымі дакументамі Нацыянальнай бібліятэкі Беларусі (2 паверх, пакой 207) адкрыта тэматычная кніжная выстаўка «Сям'я: рэальнасць, праблемы, перспектывы», прысвечаная Міжнароднаму дню сям'і.

Гэты дзень быў абвешчаны ў 1993 годзе Генеральнай Асамблеяй ААН у рэзалюцыі аб Міжнародным годзе сям’і (A/RES/47/237) і штогод адзначаецца 15 мая з 1994 года.

Зацвярджэнне гэтага дня было выклікана заклапочанасцю сусветнай супольнасці сучасным становішчам сям’і і яе значэннем у жыцці грамадства і выхаванні маладога пакалення.

Сям’я як асноўны элемент грамадства была і застаецца захавальніцай чалавечых каштоўнасцей, культуры і гістарычнай пераемнасці пакаленняў, фактарам стабільнасці і развіцця. З сям’і пачынаецца жыццё чалавека, тут адбываецца фарміраванне яго як грамадзяніна. Яна – крыніца любві, павагі, салідарнасці і прыхільнасці, тое, на чым будуецца любое цывілізаванае грамадства.

Падтрымка сям’і ў Рэспубліцы Беларусь з’яўляецца важным дзяржаўным прыярытэтам, яе значэнне падкрэсліў і прэзідэнт Рэспублікі Беларусь Аляксандр Рыгоравіч Лукашэнка, які адзначыў, што "будаваць здаровую моцную сям’ю – гэтае не толькі наша права, гэта наш абавязак" і заклікаў "аднавіць традыцыйныя каштоўнасці беражлівага стаўлення да сям’і і роднага ачагу".

Выстаўка ўключае наступныя тэматычныя раздзелы:

інстытут сям’і ў эпоху сацыяльных змен;
прававыя вытокі рэгулявання сямейных адносін;
жанчына ў сям’і: замужжа, мацярынства, кар’ера;
выхаванне дзяцей у сям’і;
здароўе – прадмет клопату сям’і;
сям’я і насілле;
псіхалогія сям’і, сям’я і шлюб.

На выстаўцы – больш за 100 дакументаў: кнігі, брашуры, перыядычныя выданні, мімеаграфаваныя матэрыялы. Вялікую частку экспазіцыі складаюць дакументы міжнародных арганізацый (ААН, ЮНЕСКА, Еўрапейскага Саюза, Савета Еўропы) на рускай, французскай і англійскай мовах.

Выстаўка будзе карысная для спецыялістаў, якія працуюць у галіне сацыяльных навук, студэнтаў, аспірантаў і выкладчыкаў сацыялагічных, дэмаграфічных і прававых дысцыплін, а таксама для шырокага кола чытачоў, якія цікавіцца праблемамі сям’і і шлюбу.

Спасылкі на Інтэрнэт-рэсурсы