З 7 па 31 снежня ў зале нотных і аўдыядакументаў (пам. 305) ладзіцца выстаўка “Талент, аддадзены людзям”, прысвечаная 120-годдзю з дня нараджэння кампазітара, педагога, народнага артыста Беларусі Мікалая Ільіча Аладава ((1890–1972).
З імем найстарэйшага кампазітара Беларусі звязана цэлая эпоха ў развіцці беларускай музыкі. Мікалай Аладаў з’яўляецца адным з заснавальнікаў нацыянальнай кампазітарскай школы, стваральнікам першых беларускіх сімфоній, опер, камерных ансамбляў, рамансаў, а таксама аўтарам цікавых навуковых работ.
Мікалай Ільіч стаяў ля калыскі прафесійнай музычнай адукацыі ў рэспубліцы, выхаваў некалькі пакаленняў кампазітараў і музыкантаў. Ён стаў адным са стваральнікаў у Беларусі першага музычнага тэхнікума (1924), Беларускай дзяржаўнай кансерваторыі (1932), Саюза кампазітараў БССР (1932). Вялікую ўвагу кампазітар надаваў арганізацыі ў краіне нотавыдавецтва і фальклорных экспедыцый па зборы беларускіх народных песень.
На творчым рахунку М. Аладава вялізная колькасць твораў. Цяжка назваць жанр, да якога не дакрануўся б кампазітар за доўгія гады свайго творчага жыцця. Яшчэ ў пачатку 20-х гадоў ХХ стагоддзя ён напісаў першыя беларускія рамансы на словы славутага песняра Я. Купалы. Тады ж стварыў першую нацыянальную камедыйную оперу “Тарас на Парнасе”, першы ў нашай музыцы інструментальны камерны ансамбль – фартэпіянны канцэрт на тэмы беларускіх народных песень.
Слова “першы” ў адносінах да музыкі Аладава трэба паўтараць шмат разоў, бо яму належаць і першая беларуская араторыя “Над ракой Арэсай” па паэме Я. Купалы, і першыя творы для беларускага народнага аркестра, і апрацоўкі беларускіх народных песень, і санаты для рознага складу выканаўцаў.
На выстаўцы дэманструюцца нотныя выданні і аўдыядакументы твораў кампазітара, а таксама кнігі і публікацыі, прысвечаныя творчасці М. Аладава.
Кантактны тэлефон: 293-27-52.