З 1 сакавіка па 1 мая ў зале перыядычных выданняў (пам. 106) праходзіць тэматычная выстаўка “Тут увасабляюцца ідэі: у дапамогу прафесійнаму чытанню педагога”.
Педагог новага часу – гэта прафесіянал, які валодае высокім узроўнем разнастайных кампетэнцый, здольны хутка рэагаваць на знешнія змены, пастаянна ўдасканальвацца, асвойваць новыя напрамкі дзейнасці, іншымі словамі, бесперапынна займацца самаадукацыяй, адаптавацца, развівацца. Прадстаўленыя ў экспазіцыі публікацыі з часопісаў “Народная асвета”, “Веснік адукацыі”, “Адукацыя і выхаванне” дапамогуць педагогу паглыбіць сваю прафесійную кампетэнтнасць у інавацыйным адукацыйным працэсе.
Адной з задач сучаснай школы з’яўляецца ўзмацненне практычнай накіраванасці навучання. Для гэтага выкарыстоўваюцца розныя формы і метады практыка-арыентаванага навучання. Квесты, лекцыі, інтэлектуальныя гульні, інтэрактыўныя майстэрні і разнастайныя праекты і практыкумы – пра разнастайнасць гэтых форм работы раскажуць артыкулы з часопісаў “Спецыяльная адукацыя”, “Минская школа сегодня”, “Пралеска”, “Гісторыя і грамадазнаўства” і інш. Педагогі-прадметнікі знойдуць цікавыя ідэі для сваіх урокаў у матэрыялах выданняў “Роднае слова”, “Фізіка”, “Беларуская мова і літаратура” і інш.
Усяго экспазіцыя налічвае каля 40 перыядычных выданняў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 25 87.
Матэрыял пададзены аддзелам абслугоўвання спецыялізаванымі фондамі.
