З 29 красавіка па 3 чэрвеня 2009 года ў Нацыянальнай бібліятэцы Беларусі (2-гі паверх, кальцавы калідор) адкрыта кніжная выстаўка “Вялікая Айчынная вайна ў мастацкай літаратуры”, прысвечаная Дню Перамогі.
Акрамя гістарычнай навукі, якая аднаўляе больш ці менш поўную карціну мінулага, ёсць яшчэ мастацтва і літаратура, што сваімі шляхамі ідуць да разумення сэнсу таго, што адбывалася з чалавекам, з народам, з народамі.
Творы пра Вялікую Айчынную вайну займаюць у літаратуры асаблівае месца. Частка гэтай спадчыны сабрана на выстаўцы, прысвечанай усім салдатам Перамогі.
Лірычны летапіс вялікай вайны пачаў стварацца ў чэрвені сорак першага, працягваецца ён і па сённяшні дзень, занатоўваючы тое, як у нацыянальнай свядомасці складаецца вобраз нечуваных раней падзей, што закранулі ўсіх. Нават тых, хто нарадзіўся значна пазней за пераможны май сорак пятага. Ваенная лірыка ў раздзеле “Муза ў салдацкім шынялі” прадстаўлена зборнікамі вершаў з творамі Г. Ахматавай, Б. Акуджавы, А. Твардоўскага, В. Бергольц, М. Алігер, У. Высоцкага, Р. Раждзественскага, Ю. Друнінай, І. Эрэнбурга і інш.
У раздзеле "Напісана вайной" сабрана ваенная проза. Тут экспануюцца прэзентацыйныя выдавецкія серыі, створаныя напярэдадні святкавання юбілеяў Перамогі: "Великая Отечественная", "Священная война", "К 60-летию Победы", "Победа" і інш. Вайна ў творах А. Адамовіча, В. Астаф’ева, Р. Бакланава, Ю. Бондарава, В. Быкава, Б. Васільева, В. Гросмана, В. Распуціна, К. Сіманава, І. Чыгрынава, І. Шамякіна, М. Шолахава і іншых выдатных пісьменнікаў адлюстравана глыбока і ўсебакова, ва ўсіх сваіх праявах: трагічны пачатак вайны, армія і тыл, партызанскі рух і падполле, гераізм і здрадніцтва, веліч і драматызм Перамогі.
Раздзел “Кіналетапіс подзвігу” прысвечаны фільмам пра Вялікую Айчынную вайну. Мультымедыйнае выданне “100 фільмаў пра вайну” – істотны дадатак да названай часткі экспазіцыі. Наведвальнікі выстаўкі змогуць убачыць фотакадры са знакамітых ваенных фільмаў.
Кантактны тэлефон: 293-28-86.